March 5, 2025 Nilaini hian Dr. Lalmalsawma Nghaka, Treasurer MPCC chuan Saiphai, Saipum, Phainuam leh Vairengte khua-a hmunphiah chingtute harsatna a hmunah a tlawh.
Dr. Mala chuan, “Sawrkar a intiam anga a din loh avangin Zoram dung leh vanga Kuthnathawkte zingah beidawnna a thleng mek,” tih thu a sawi.
MPCC Treasurer chuan, “Hmuhphiah bikah ngat phei chuan, nikum lamah lungngaiin an kun ngawih ngawih tawh a, kuminah pawh an manganna chu beidawnna runpuiah a chang chho mek a ni.
“Sawrkarin hmunphiah lei tura a intiamna chu dawtah a chan mek avangin, hmunphiaha eizawng te chawbel ben buak sakin a awm a. Kum tluana an tha sen pawh engmah lovah a chang chho mek a, an hma lam hun beidawng takin an thlir mek a ni. Congress Sawrkar laia hmunphiah hmun siama bulṭan an ni tlangpui a. Kum khata cheng nuaih 2 chuang hmu thin te khan, ZPM Sawrkar hnuah sing 4-5 pawh an la lut pha tawh lo nawk a ni.
“ZPM Party President Chairman-na ZOHANDCO chu hmunphiah ro quintal 7240 vel Society kaltlanga lei turin sorkarin a ti tih kan lo hria a. ZPM intiamna kg.-a Rs. 100 tih chu ZOHANDCO hian a aia hniam daih, Rs. 80 in lei an tum a, ZOHANDCO hian a leina tur sum hi an la nei lo niin kan hre bawk.
“Kan hrawn lai mek Sawrkar hian pawisa puk chawp leh a ba thlau-a ram min hruai mek ang hian, hmunphiah leh sawhthing leina tur te pawh a ba-in a kalpui dawn niin a lang chho mek a.
“Tuna kan Sawrkar hrawn mek ZPM hian an intiam anga an awm loh zia Zoram mipuiten an hmu zel a, Sawrkar ah beisei tur an hmu tlem tual tual a ni.
“MNF Sawrkar kan hrawn zawh chiah nen thu tiama din loh kawngah danglamna an nei lova, mipuite beiseina a thlawn a, beidawnna khura min hruai lut tu tur an ni tih mipuiin kan hmu fiah telh telh a ni.
“ZPM Sawrkar hian kuthnathawk, miharsa leh rahbi nghet lo te harsatna a hmunah en ngai lovin, an dinhmun dik tak a hmu thiam pha lo va, mi nawlpui harsatna hi an hrethiam pha lo tih a chiang hle a ni.
“Mizoramah hian Sawrkar lo awm tawh leh awm mekte zingah mahni thuthiama ding nghet a, mahni flagship hlawhtlinpui awm chhun chu Congress Sawrkar a ni tih mipuiin an hre chiang tulh tulh a ni.”
“Mi harsa zawk te, kuthnathawk te, sawrkar hnathawk te leh mi nawlpui te tana thian tha ber chu Congress Party a ni tih a lang chiang chho ta hle a.
“Mizoram mipuite hmangaihtu ber party, Congress lam rawn hawi a, rawn haw a, Congress Party tha ti chak turin Mizoram mipui zawng zawng kan sawm tak meuh meuh a che u,” tih thu a sawi.
MPCC Treasurer hi Congress party hotu, Pu PC Zothanpara, Pu Anggu Lalhmachhuana, Pu Lalchuailova, Pu Laltlankima leh Pu Lalfela ten an tawiawm a ni.
