Vawiin khan Higher & Technical Education Minister Dr. R. Lalthangliana chuan Johnson College in zirlai thar an lawmluhna leh zirlai chhuak tur te thlahna programme ‘Freshers’ Social cum Graduation Programme’, Vanapa Hall-a an buatsaih chu khuallian niin a hmanpui.
Higher & Technical Education Minister Dr. R. Lalthangliana chuan Mizorama kilkhawr leh thingtlang leh chhungkaw dinhmun pan leh harsa atanga lehkha zir tura khawpui lo kal te pawh, an tumruh leh an taimak chuan dinhmun pawimawh tak an chelh theih a, eng chhungkua atang pawhin hlawhtlinna a neih theih thu leh chhungkaw eizawnna lamah harsatna kan lo nei a nih pawhin min pawt hniamtu ni lo a, tumruhna min petu a hmang turin zirlai kalkhawm te a fuih a. Khawvel thlirdan thiam turin leh huphurh zawnga en lo a, midang tih thei chu Mizo ten an ti ve ngei thei tura inngaiin khawvel chu chhuk en lova, a khamphei zawnga en a, chu chu chona lian taka a nei turin zirlai te a chah.
Johnson College zirtirtute chu tunah an Department tlanglawn paruk neih mek chu duhtawk lovin tunlai khawvel thiamna hman tangkai theihna leh hna hmuh theihna leh eizawnna neih thei ang chi course leh stream atan ngaihtuahna seng turin a chah a. College tihchangtlun leh tih hmasawn kawngah Sawrkar chuan a tih thei ang ang a ngaihtuah zel dawn tih sawiin, kum khat chhunga Mizoram College pahnih Govt. Serchhip College leh Govt. Zirtiri Residential Science College ten NAAC assessment ah A grade an hmu thei chu a lawmpui tak zet thu Minister chuan a sawi a.
Minister Dr. R. Lalthangliana chuan Johnson College in hma a sawn chak nia a hmuh thusawiin college 28 zinga result nei tha ber pawl, 95% pass percentage neihna college an ni chu a lawmpui thu a sawiin, Political Science Department ah Rank holder an neih bawk avangin a lawmpuiin a chhuan thu a tarlang a.
He programme ah hian College Principal Prof. K. Vanlalmawia pawhin zirlai fuihin thu sawiin zirlai te tan an lehkha zirna kawnga pui turin a bika mentoring programme an kalpui dante a sawi a. Programme hi chhawng hniha neih niin Minister in programme hmasa zawk hi a hmanpui a, chawhnu lamah award chi hrang semna leh zirlai ti thate chawimawina an nei dawn a ni.
Govt. Johnson College ah hian zirlai mi 1100 vel leh Department 6 an awm a, teaching faculty 32 awmin, non-teaching staff 13 an awm mek a. Kum 1993 a din niin, a tirah chuan private college a ni a, kum 2002 khan deficit a hlankai a ni a; kum 2007 khan provincialised a ni.
