Commerce & Industries Minister Dr. R. Lalthangliana chuan Dimapur, Nagaland-a North East Geology & Mining Minister Conclave hlawhtling taka a hman zawh hnuin Thawhlehni khan Kolkata-a United States Independence Day lawmna a hmanpui.
Kolkata-ah hian US Independence day vawi 246 na leh India leh United States ramten kum 75 chhung inlaichinna an lo neih tawh lawmnaah hian Melinda Pavek Consul General, US Consulate, Kolkata sawmna angin Dr. R. Lalthangliana hi he hunah hian a tel a. He hun hi JW Marriot Hotel, Kolkata-ah hman niin, US thiantha ram aiawhte, sumdawnna lama an thawhpuite leh mi pawimawh engemaw zat an tel a ni.
US Independence Day hi July ni 4 ah lawm thin a ni a, rokhawlhna a awm avangin India ramah chuan US Embassy hian November ni 1, 2022 ah a lawmna an buatsaih thung a ni. He hunah hian Dr R. Lalthangliana chuan thu sawiin programme huaihawttu te duhsakna a hlan a, Indo-US relationship chawi nun zel a pawimawh thute sawiin, USA ah Mizote thahnemtak hna chi hrang hrang thawk an awm thute a sawi bawk a, Mizoram atanga tul bik thil a US-a zin tuma visa diltute lo ngai pawimawh a, lo duhsak thin turin a ngen bawk a ni.
Dr R. Lalthangliana hi US Consul General Melinda Pavek nen inkawmin, US leh India ten kawng hrang hranga an thawhdunnate, Mizoram tana hriselna lama hma lakna tur chungchangte an sawidun a. Minister sawm anga Mizoram a rawn zin a tum, engemaw rokhawlhna avanga thulh a ni chu pawi a tih thu leh remchang hmasa berah rawn zin ngei a tum thu Melinda Pavek hian a sawi a ni. Minister hi Centre for Diseases Control, USAIDS, Consulate Media department leh mi pawimawh tak tak te nen inkawmin, Mizoram tana hmachhawp leh thawhho zelna tur thil te an sawi bawk.
Minister hian Kolkata Mizoram House a dam lo te thingpui inna tur leh Kolkata Mizo Welfare ten a tul apianga an hman turin Rs. 10,000/- ve ve a pe bawk a ni.
