MNF party chuan an general sescretary VL Kroshnehzova hovin vawiin khan Aizawl Press Club-ah chanchinthar lakhawmtute kawmin, “ZPM Thalai chuan June ni 2, 2023 khan thuchhuah siamin, June ni 1-a Press Conference kan neiha kan thu leh hla mimal inbeihnaa an ngaih thu leh thu belhchian dawl lo a nih thu an sawi a.
“An thuchhuahah khan, ‘Pu VL Krosshnehzova’n Ramhlun South YMA Y-Section hna chungchanga Dr.Vanlalthlana a beihna pawh hi hre reng chunga mimal inbeihnaah ZPM Thalai chuan a ngai a, kha thilah khan file a kal thui hmain Dr.Vanlalthlana hian a cancel vek a ni,’ tih an ziak a.
“Ramhlun South YMA Y-Section in sak mek chhunzawmna tur tihfel vek tawh ZPM huamhauh lutuk avanga cancel leh a tul ta hi a pawi hle a. ZPM-in an duh ang thlapin pawl thianghlim YMA chu thuchhuah an siam tir a. An thuchhuah siam tirah chuan ‘ZPM, Ramhlun South Unit III te chuan Vengchhung hmasawn nana MLA fund Rs 2,50,000/- an hmuh chu Ramhlun South YMA, Y Section In sak mek sak chhunzawm nan min hlan a ni. Tin, hemi sum atang hian Rs 30,000/- (12%) chu ZPM Ramhlun South Unit III te hnenah Ramhlun South Branch YMA, Y-Section chuan lawmthu sawi nan hlan let a ni,’ an ti a. ZPM-in YMA hnena pawisa an dil leh percent an la ve ringawt tur hi khawtlangah sawi neuh neuh a awm takah chuan an inthlahrung leh si a, a ruk thei ang berin an cancel leh ta a.
“YMA meuhin an thuchhuahah ZPM Ramhlun South Unit III-in MLA fund an hmuh thu hi an tarlang a. MLA Fund party unit hnena pek hi dan kalh a ni. Mipui hriata a tlangthan tak avanga a cancel leh ta hian, an Leader Pu Lalduhoma zin loh bill la, mipuiin an hriatchhuah hnua a pe let nen khan a inang rengah kan ngai a. Dr Vanlalthlana hi Chief Ministerial candidate nen hian an inchhun fuh hlein kan hria a. ZPM kalphung thar zawrh mek hi a makin hriatthiam a har hle a, kalphung thar tha lo tak niin kan ngai a ni.
“ZPM-in an hmaibal phih nan pawl thianghlim YMA an hmang leh chumi hnua an in sakna tur chhunzawm theih lova cancel a ni ta hi a pawi kan ti hle a ni. Hetiang a nih avang hian Ramhlun South YMA Y-Section in sak mek pawh chhunzawm lohin a awm phah a. Bialtu MLA hian ZPM Party hnena percent pe kual lo hian a rang thei ang berin Ramhlun South YMA Y-Section hi an in sakna tur a pek thuai kan phut a ni.
“ZPM hian an policy bu Sustainable Development & Reform Policy (SDRP)-ah chuan, ‘ZPM sawrkar chu kalphung thar, mipui sawrkar thuneihna semzai (Decentralization of Power & Collective Leadership) a ni ang a, sawrkar chak leh huapzo siam turin ……. administrative reform a kalpui ang,’ tiin an ziak a. Thuneihna sem zai tlangaupui reng chungin mipuiin an aiawh tura an thlan tlin Local Council chuan ngaihthah a hlawh hle a ni.
“Aizawl North II bialtu MLA Dr Vanlalthlana hian a bial chhunga Local Council, mipuiin an veng roreltu atana an thlan, development fund khawih tura agency dik leh rintlakte hi a rep char vek a. A bial chhung veng hrang hrang Local Council pakua (9) te hi fund a pe ve ngai mang lo a. A pek ve nia lang pahnih khatte pawh hi a hnathawh leh a hlawkna awm zawng zawng chu ZPM-in an pumhmawm vek zel a ni. Heti taka party invulh bikna kalpui mekin ‘mipui sorkar’ an zuar ngam leh a sawitu bera Dr Vanlalthlana a la tang ngam hi a zahthlak hle a, mipui bum tumna dik tak a ni.
“Aizawl North II bialtu MLA Dr Vanlalthlana’n Ramthar North Branch YMA hminga hna a pek Construction of RCC Road, nuai 15 man, ZPM Block-in Ramthar North venga an thawh chu Media & Publicity chuan a hmunah kan tlawh a. He kawng hi meter 15 vela thui, a lian lai meter 3 vela lian a ni a. RCC-a siam tur a nih laiin PCC-a siam a ni a, culvert lai bikteah lo chuan rod hman a ni lo. Tlak dal pawh siam a ni lo a, tlak dal hi tun hnaiah MLA fund bawk Rs 50000/-in siam thar leh a ni.
“He kawng siamna tura pawisa ruahman nuai 15 hi a tam uchuak hle a, an hnathawh dan nen a inmil lo hle. MLA leh ZPM Party hian uchuak takin sum siam nan mipuite mamawh em em kawng siam hna hi an hmang niin kan ngai a. Hetianga ZPM party-in YMA hming an tihliau hi a pawi kan ti tak zet a ni.
“Aizawl North II bialtu MLA Dr Vanlalthlana hian party mite duhsak bikna tur liau liaua a din chawp pawl, Aizawl North Development Society (ANDS) hmang hian ama mimal sum tur leh ZPM sum tur chu tuak mai turin thurawn kan pe a, Pawl thianghlim YMA hming tibawrhbang zawnga che lo turin kan ngen a ni,” a ti.
