MPCC President Pu Lalsawta’n Duhamna chu natna angin damdawi a awm ve lo, kan ramah rualpawlna ang lekah kan ngai tawh si a pawi takmeuh a ni a ti
Pu Lalsawta chuan he thu hi Inrinni tlai dar 3:30 a Serchhip Bazara Mizoram Pradesh Congress Committee buatsaih vantlang inkhawmah a sawi a. He public meeting Pu Lalramnghaka Kawlni Serchhip block congress committee President kaihhruaiah hian MPCC President hian Indian Super League (Football) champion team a tel, Hyderabad FC player Mark Zothanpuia s/o S.Vanlalchhunga hnenah Serchhip block congress chawimawina siam thuziak leh tangkafai engemaw zat a hlan bawk.
Pu Lalsawta chuan Mizoram chu indona hmuna awm mek kan nih lantirtu chu nu leh pa ten fate an sun mekna hi a ni a. Duhamna leh mahni hmasialna chu assembly ah hial pawh a lang tawh a ni a ti a. 1995 a central minister Sukh Ram-a’n a in a sum chheh relh an mansak ṭuma a sawi ‘Ka ta a ni lo’ a tih chul ang kha keini ramah pawh a thleng mek a ni tiin, ram siam ṭha tur chuan mizoram mipui te ngei hi kan ṭha ber a, i thawk tak tak teh ang u a ti.
Thusawitu dang Pu Lal Thanzara MPCC Vice President chuan nakum maia assembly inthlan lo awm turah Chief minister ni thei tur te uluk tak a khaikhin tura mipui chahin, Pu Lalsawta’n sorkarna an siam theih hunah hlemhletna leh mipat hmeichhiatnaa fihlim lo MLA aṭanga ban a intiam ang hi Mizorama tu party CM candidate te mahin an sawi ve ngam lo a ni a ti.
Pu Zodintluanga MPCC Treasurer pawhin, Mizoram hmun hrang hrang an tlawh report sawiin, Serchhip bial MLA Pu Lalduhoma’n party dang hruaitu beih a chin ṭhin dan leh thudik lo a sawi te a sawi lang a. MNF vanglai chu Mizoram boruak hrehawm lai ber a ni a, an sorkar hmasakah pawh inruk bo hel chetna a hluar a,1966 a rambuai thlengah te pawh hnam himna leh remna thlen ṭhintu congress party a ni zel ṭhin a ti a. Tun hnaia Mizoram chhim lam an tlawhnaah cong.zawm thar mi 3000 chuang lawmluh an nih thu a sawi bawk. He hun hmangtu MPCC hruaitute hian inrinni tlai vek khan Aizawl panin Serchhip an chhuahsan a ni.
