Durtlang Mualveng a electric detonator –kep- puak vangin mi 3 thi

Tukin dar 8:45 bawr vel a Durtlang Mualveng a electric detonator –kep- puak vanga chhiatna thlengah mi 3 an thi a, hliam tuar pakhat Synod hospital, Durtlang ICU a enkawl mek niin a dinhmun a tha vaklo nia thu dawn a ni.
Vanduaina thlenna hmuh hi Selesih – Durtlang road, motor siamna workshop a pakhatah a ni a, workshop neitu Lalhmangaihzuala (Buanga), Durtlang North leh a mi chhawr Lalthafamkima, Thuampui, Aizawl te chu a hmunah an thi a, damdawiin thlenpui a nih hnuah Lalmawikima, Sakawrdai ami chu a hliam tuar lovin a thi a, tun dinhmunah Thangsohrai, Damparengpui chu Synod Hospital ICU ah enkawl mek a ni.
Lalmawikima leh Tangsawrai te hian tukin khan an motor (pik up) siam tir turin Buanga workshop ah an lut a, motor an siamlai leh welding lam an khawihlaiin pik up a puak thei lam thil (detonator) an phurh chu mei si perin a dep fuh nia hriat a ni a, pik up ah hian detonator dang pawh an phur nual nia hriat a ni a, hengte hi police lamin an la vek tawh nia thudawn a ni.
He thil puak hi a tirah chuan workshop a an hman welding na gas puak nia ngaih a ni a, amaherawhchu thil awmzia enfiah a nih hnuah gas puak a ni lo a, Chhiatna thlenna hmuna awmte zawhfiah tur an awm loh avangin, finfiahna chiang tak hriat tur engmawh a awm rih lo tih kan corr chuan a sawi a ni.
He chhiatna hian thil puahna hmun hnai vai a awm In 14 emaw vel a nghawng a, tukverh darthlalang keh te, in bang khi te a awm nual a, in thenkhatte phei chu riah chhuahsan ngai hial turte pawh a awm dawn nia thudawn a ni, vawiin khan khawtlang hnatlang koh nghal a ni.