Dy. Chief Minister-in Faina Hapta a hawng

Mizoram Deputy Chief Minister Tawnluia, UD&PA Department changtu chuan vawiin khan Cleanliness Week vawi 46-na chu MINECO Junction-a programme buatsaihah a hawng a. Faina hapta hi October ni 8 thleng hman a ni ang. Kumin faina hapta ah hian thupui atan “Bawlhhlawh paih hmaa thliar hran” (Waste Segregation at Source) tih hman a ni a. Aizawl Deputy Mayor R Thanglura pawhin he hun hi a hmanpui a ni.
Tawnluia chuan India hnampa Mahatma Gandhi pianchamphaphak puala kum tina neih thin Faina Hapta chhung hian Mizoram sawrkar pisa te, school, college leh zirna in hrang hrang te, damdawi in te, bazar leh mipui punkhawmna hmun hrang hrangah faina beihpuithlak a ni dawn, a ti. Mizoramah faina leh hriselna kawnga sawrkarin enkawltu tur a buatsaih PHE Department chuan thingtlang khua zawng zawngte a enkawl a, UD&PA chuan Mizoram chhung state khawpui te a enkawl thung, Deputy Chief Minister chuan a ti a. Aizawl khawpui bikah phei chuan faina leh thianghlimna kawngah Aizawl Municipal Corporation chu a mawhphurtu ber niin UD&PA Directorate pawhin AMC kaltlang hian hma a la thin a ni, a ti.
Khuallian chuan faina leh thianghlimna hi mahni in chhungah theuh bultan tur a ni, a ti a, chhungkaw tinin tihtakzetin tan la se a duh thu sawiin kum upa zawk te tihturah dah mai lovin thalaiten he mawhphurhna hian hma an hruai tur a ni, a ti. Faina beihpuithlak hi faina hapta chhung chauha duhtawk mai lovin fai leh thianghlim hi tihthanah neih a, tih dan phung pangngaiah nei turin ram mipuite Deputy Chief Minister chuan a sawm a. Kumin faina haptaa thupui atana an hman ‘Bawlhhlawh paih hmaa thliar hran’ chu mahni in chhungah theuh bul tan turin a sawm a ni. Bawlhhlawh sawngbawl kawnga sawrkar hmalakna sawiin Tawnluia, chuan Solid Waste Management Centre Tuirialah leh Kolasib-ah pilot project a awm mek thu a sawi a. Aizawl khawpui chhungah hmun hrang hrangah Solid Waste Management Centre din tum niin, a hmunhma tur te pawh ruahman lawk a ni tawh a ti a. Swachh Bharat Phase – II kalpui mekah Mizoram chuan ODF Plus dinhmun a chuankai ngei theihna tura tan la turin kalkhawm te a sawm a ni.
Faina Hapta hawnna inkhawmah hian inelna chi hrang hrang lawmman semna hun hman a ni a. Essay Writing Competition (Cat-1) ah Hmangaihrammawii, Andrew Lalruattluanga leh Grace Suihleipar, Home Mission School zirlaiten lawmman pakhatna atanga pathumna an la a. Essay Writing Competition (Cat-2)-ah Lalpekhlui Hlawnmual, Home Mission School in lawmman pakhatna, Philip Thanmawia Ralte leh Vanlalchhanzeli, St Pauls Hr.Sec.School ten lawmman pahnihna leh pathumna an dawng a. Video Making Competition ah Lalthlamuana, Lalmalsawma leh K. Lallawmkima ten lawmman pakhatna atanga pathumna an dawng a. Reel making competition ah Samuel Gangte, PUC, NSS; Slogan Writing Competition ah Lalpekhlua, T.Romana College ten lawmman an dawng a ni.
Kum 1977, October ni 2 atangin kum tinin Mizoramah Faina Hapta (Cleanliness Week) hman thin a ni a. Faina Hapta 2022 hi Mizoram khawpui (notified towns) zawng zawngah chuan October ni 1, 2022-ah hawn a ni a, Aizawl leh Serchhip-ah erawh rokhawlhna a awm avangin hawnnna hun hman a ni thung. He Faina Hapta hawnna ni hi Swachhata Diwas ‘Faina Ni’ atana hman niin, Khawpui tina veng zawng zawngah ‘Faina Hnatlangpui’ neih a ni a, Faina Hapta chhung hian in, zirna in, sumdawnna hmun, sakhaw hmun leh sawrkar pisa ah te bawlhhlawh thliarhran inziritirna beihpui thlak a ni ang.