Aizawl, April 28 : Deputy Chief Minister Pu Tawnluia’n vawiin khan Mizoram Government Driver’s Association (MGDA) General Conference vawi 29-na Synod Conference Centre-a an buatsaih chu khuallian niin a hmanpui.
Deputy Chief Minister Pu Tawnluia chuan kum hnih chhung hripuiin khawvel hmun tin a tuam angin Mizoram leh Sawrkar pawh tuamin a tihbuai thusawiin hripui dona kawngah sum leh pai kan seng nasa a, engmah tithei lovin min siam a, Department hrang hranga thawktu indaih lohna pawh duh angin engmah a tih hleih theih lova mahse hripui dinhmun a ziaawm chho takah chuan a thei angin angin post ruak hnawhkhah kawnga Sawrkarin tan a la dawn tiin a sawi. Post thar siam chu a la harsa rih ang a, post ruak hnawhkhah erawh chu kan tithei thuai tawh turah kan ngai a, tunah hian hnaruak hnawhkhah tur chungchang hi zirchian mek a ni, a ti.
Sawrkar driver te chu Sawrkar hotulu berte hnai taka hrawn leh enkawltute te an nih angin rinawmna leh thu vawn theihna confidentiality pawimawh zia te chu an hriatsa mah nise hengte hi an hnathawh kawnga hre thar leh turin a chah a. Traffic dan leh dun chu engtik lai pawhin zawm tura chahin chetsualna laka an him theih nan fimkhur a tulzia te hre thar leh turin a chah bawk a ni.
General Conference hi Pu Vanlalchhuanga, Vice President MGDA Gen. Hqrs. chuan kaihruaiin General Secretary leh Finance Secretary te hnen atangin report ngaihthlak a ni a. Member boral ta te pualin hun hman a nih bakah hruaitu hlun te chawimawina hun pawh an hmang a. Chawhnu lamah rorel inkhawm hun hmangin hruaitu thar thlanna a nei bawk a ni.
Mizoram Government Driver’s Association hi kum 1964 khan ding tanin tunah chuan Sub Headquarters 8 leh Branch 5 an nei a, member 700 chuang an nei mek a ni.
Report ah an tarlan danin kum 2019 – 2022 chhungin an member 54 an boral a, kum 2018 – 2022 chhungin pension a chhuak Member 75 an awm a. COVID-19 hripui dona nan CM Relief Fund ah cheng nuai khat an thawh a ni.
