Deputy Chief Minister Tawnluia’n Chalrang khua in vawiina Vangpui Kut, Community Hall ah an hman chu khuallian niin a hmanpui.
Vangpui Kut hmanpuitu Deputy Chief Minister Tawnluia chuan Kut chungchang sawiin Mizoten Kut chi hrang hrang Chapchar Kut, Mim Kut, Pawl Kut leh vawiina kan hman Vangpui kut hi kan hmang thin a. Kut hi Kristianna lo luh hma, tunhma chuan uar takin kan hmang thin a, Kristianna a lo luh hnuah kan hman thin dan anga hman a rem ta lo a, tun hnuah zu leh ruihhlo tel lovin uar taka kan han hmang thar leh ta hi a lawmawm a, Mizoten Kût hi kan puipunna leh kan intihhlimna hun pui ber a nih avangin Kristianna sadai thiat lovin thianghlim takin uar takin i hmang zel ang u tiin a duh thu a sawi.
Tawnluia chuan kan hnam lam chi hrang hrangte hi a a titute hian lemchang anga tih a awl khawp mai. Heng kan hnam lam te hi kan ta a ni a, kan lamdan a ni a, lemchang ni lovin a ti tuten tihtak zet zet a, kan tih a ngai a, chutianga kan tih chuan hmuh pawh a hmuhnawm bik a ni a ti a. Hnamlam te hi zirna school zawng zawngah te subject pakhat ah nei thei ila tiin duh thu a sawi bawk a ni.
Chalrang Vangpui Kut hmannaah hian thupui atan Faina hman a ni a, Khuallian chuan Faina chungchang sawiin tun a lo zin pawh Khawhai khuain faina an lawm a, Biate khuain Mizoram a khawfai lawmman zawna kum 5 an lak lawmna ah ka tel a, Khawzawl District hian Faina inelna ah pawh Ram pum huapa khua kan lang thin hi lawmawm a. Faina kawnga theihtawp lo chhuah chhunzawm zel turin mipuite ka chah duh cheu ni, a ti.
Chalrang khua in Vangpui Kut an hmanna hi SL Malsawmkima President, YMA Chalrang Branch in a kaihruai a, hunserh hi Upa Lalhmingmawia Tochhawng in a hmang a ni.
Chawhnu lamah Chalrang Kawnzawlah Mizo hnam lam leh intihhlimna hun hman a ni a, tlaiah Kùt ruai ropui tak khawtlangin an theh a ni
