‘PUM’ Mizoram Innovation Fair 2022 chu vawiin khan Industrial Training Institute (ITI), Aizawlah Deputy Chief Minister Tawnluia’n a hawng. Hawnna inkhawm, ITI tualzawla buatsaihah hian Labour, Employment, Skill Development and Entrepreneurship (LESDE) Minister Lalchhandama Ralte leh Commerce and Industries Development Board Vice Chaiman K.Laldawngliana, MLA te pawh an tel a ni.
Deputy Chief Minister Tawnluia chuan, thalaite thiam thil tihpuna eizawnna tlinga siam chu tunlai khawvelah a pawimawh em em a, hemi kawnga hmalatu LESDE Department pawh sawrkarin a tuaihnum chho zel a ni, a ti. Zirna tluang pangngai chu a inrelfelin a inremfel thlup tawh a, zirchhuak an tam a, degree sang pui pui nei pawh tam tak an awm tawh a, amaherawhchu, eizawnna hna in a daih seng si lo, Deputy Chief Ministerchuan a ti a. Miin a thiam thil hmanga ei a zawn theihna tur kawng zawnpui hi thil pawimawh leh tul a lo ni lehzual ta a, degree sang tak nei kher lo pawha eizawnna hlawk tak neih theihna kawng a nih avangin a tangkaiin a pawimawh ta tawlh tawlh a ni, a ti. Tawnluia chuan Sawrkar hmalakna SEDP hnuaiah kuthnathawktute khaichhuahna leh intodelhna tur ruahman a ni a, Skill Training hi SEDP hlawhtlinna tura hmanraw pawimawh a ni, a ti a. LESDE hian tunhma aia awmze nei leh mumal zawkin hma a la a, World Education Summit ah te hial lawmman a dawng thei tiin Department a thawktute zawng zawng a lawmpui thu a sawi bawk. Mahni kutkawih hmanga kut themthiam ten an thil siamchhuah pholanna hun ‘PUM’ tih hming an puttir chu a inhmeh hle tiin he huna tel zawng zawngte duhsakna a hlan a ni.
LESDE Minister Lalchhandama Ralte chuan tun dinhmunah Mizoramah ITI pathum – Aizawl, Lunglei leh Champhaiah te a awm mek a, hmun pali dang – Champhai, Serchhip, Kolasib leh Mamit ah te din leh tum niin ruahmanna a kal mek, a ti a, Mamitah hian building sak zawh tawh niin session tharah tan hman tum a ni, a ti. Minister chuan ram hmasawn apiangah skill development an ngai pawimawh a, India Prime Minister ngei pawhin ngai pawimawhin skill development hmang tangkaia ram tihhausak a tum, a ti a. National Education Policy 2020 pawhin skill development chu a dah lian hle a, India ram leh khawvel ram dangte pawhin an ngaih pawimawh skill development hi Mizoram Sawrkar pawhin ngai pawimawhin hma a la mek a ni, a ti. PUM 2022 a tel zawng zawngte a lawmpui thu sawiin Lalchhandama Ralte chuan an talent tuaihnum zel turin duhsakna a hlan a, hetiang lama tui mite tan LESDE Department a inhawng em em a ni, a ti bawk.
‘PUM’ Mizoram Innovation Fair hi ITI-a zir mekte, zir chhuak tawhte leh kut themthiamna lama tui leh thiamthil neite tana buatsaih niin, an thil siamchhuahte chu he hunah hian phochhuah a ni a. Inelna a nih bakah an thil siam te mipui tan lei theiha zawrhchhuah a ni.
Ni thum awh tur PUM-2022, Innovation Competition & Exhibition Fair hi a tum hnihna atan Ministry of Skill Development & Entrepreneurship (MSDE) hnuaiah LESDE chuan a buatsaih a. Sum leh pai senso hi Sawrkar laipui scheme Skills Strengthening for Industrial Value Enhancement (STRIVE) leh Skills Acquisition and Knowledge Awareness for Livelihood (SANKALP) atanga hmuh a ni. Inelna hi thuang hnih – Engineering leh Non-Engineering Group ah then a ni a. Engineering ah hian mi 25 telin Non-engineering ah 39, a vaiin 64 an tel. Skill and Entrepreneurship Award sem a ni dawn bawk a, hei hi District tin atangin District Screening Committee ten thlang chhuakin State level Screening Committee in a lo endik leh dawn a ni.
