Vawiin hian PC Party chuan Pu Lalrinzuala Chawngthu, Vice President kaihhruaiin economic policy thar ‘Khawl Hnuh Hmasawnna : Mi tin tan In leh Hna’ an tlangzarh.
He hunah hian Rev. Dr. B Hmingthanzauva, President, Christ Redemption Church in hunserh hmangin ram hruai hnaa Pathian thu awih pawimawhna a sawi a. Pathian duh zawnga kal thiam a ṭul zia a sawi a ni.
Pu Lalhmangaiha Sailo, President in PC Party in ram hmasawnna tura hma a lo lak tawh dan leh hmalak a tum dan te sawi in he policy hi a tlangzarh a. David Lalrinchhana, Research Scholar in he policy bu siam chu preview in a ṭhat viau laiin sawifiah belh ngai a tam zia te a sawi a. Mizorama sorkar hmalakna hlawhtling tawk lo ṭhin te zirchian leh kalphung siamṭhat ṭul zia te a sawi.
Hemi hnu hian Pu Vanlalruata, Sr. Vice President in power point presentation hmangin policy hi a sawi fiah a. “He policy hi kan ram dam theihna, rin thu nena siam ni lo, mi hlawhtlinna zirchianna aṭanga piang anih avangin kan ram tan a hlawhtlin a ngai a. A hlawhtlin theihnan hma lakpui atan mi zawng zawng kan sawm che u a ni,” a ti.
Vawiina tlangzarh tak policy hi a bu a siam a ni a. A bu hi Rs 20 man a ni a. A duh apiang tan party office ah lei theih a ni a. Lei theihna tur hmun dang pawh ruahman thuai a ni ang an ti.
