Edu. Minister-in Zoram Kohhran Hmeichhe Khawmpui lian neihna tur tlawh

Vawiin khan School Education Minister Lalchhandama Ralte chuan Zoram Kohhran Hmeichhe Inkhawmpui Lian 2023 neihna tur Darlawn a tlawh a, khawchhung kawngpui cheithat dan tur a en kual a, Pandal sak hna thawh mekah a hnatlang nghal.
Minister chuan Darlawn Venghlun VC house-ah Inkhawmpui Lian Organising Committee te chu inkhawmpui atana inbuatsaihna a sawipui nghal a. Department thenkhat PWD, PHE, P&E hotute Darlawn khaw mamawh an phuhruk dan tur a sawipui a, Department hotute hian an hmalakna chi hrang hrang khawchhung inkalpawhna kawng chul mam hna thawh mek te, tui supply tihthat dan turte, pandal-a power pek dan turte an report bawk.
Minister chuan Inkhawmpui inbuatsaih nan Darlawn khaw chhung faina hna thawh a tul dan te, zunram thiarna siam dan turte, emergency a hman a tul thulha helipad hman theih tura chei mam tum a nih dan te a sawi.
Minister chuan Darlawn khaw chhungkaw tinte chu mikhual thahnem tak lo dawngsawng thei turte, mikhualten hahdam leh nuam ti taka hun an hman theih dan turte ngaihtuaha inbuatsaih a tul thu a sawi a. Minister chuan mipuite chu phur taka inbuatsaih tur te, hlawhtling taka inkhawmpui thlen a nih theih nan theih tawpa inbuatsaih turin a sawm bawk.
Rev B. Darnghakliana, Chairman, Organising Committee chuan Inkhawmpui Lian inbuatsaihna a report a, Kohhran inbuatsaihna pawh a kal tluan thu te leh sorkar hmalakna leh inbuatsaihnaah an lawm thu te, bialtu MLA Pu Lalchhandama Ralte hmalakna lawmawm an tih thu a sawi bawk.