Eiruk a reh nan YMA-in hma a la dawn

YMA Rorel Inkhawm vawi 3-na chu vawiin ni 27.10.2022 (Ningani) hian Thingsulthliah Khelmual, Zawlbuk Run-ah neih a ni. Rorel palai 1452 an kal.
Rorel inkhawm hi R. Lalngheta, President, Central YMA chuan kaihruaiin, an thu ngaihtuah hrang hrangah YMA khawih bikah chuan hengte hi pawm a ni ;
1. YMA General Conference tih thin chu ‘YMA Inkhawmpui Lian’ tia hming thlâk ni rawh se tih chu pawm a ni.
2. Eirukna leh hlemhletna a reh theih nan Central YMA in tun aia chak zawkin hma la rawh se tih chu pawm a ni.
3. General Conference/ Rorel Inkhawm pualin YMA Member tinah Rs. 5/- khawn ve thin ni tawh rawh se tih chu pawm a ni.
4. Hnamdang hnenah In hmun/ huan/ lo/ ram lei leh hralh/ hlanchhawn zel a nih loh nan Mizoram chhunga In hmun/ huan/ lo/ ram hralh leh hlanchhawn a nih dawn reng rengin, YMA hriatpuina tel zel a nih theih nan Central YMA in chak takin hma la rawh se tih chu pawm a ni.
5. YMA chetvelnaa hliampui tuar/ nunna chân an awmin Central YMA-in tanpuina/ râlna pe thin rawh se tih chu pawm a ni.
6. Sawrkar atanga lehkha leh form fill-up tur Mizo tawnga tih chhuah a nih theih nan hma lak ni rawh se tih chu pawm a ni.
7. Zonun zemawi uar zawka in zirtir dan kawng zawn ni rawh se tih chu a thu siamremin ‘Zonun zemawi uar zawka in zirtir ni rawh se’ tiin pawm a ni.
8. thangtharte zingah Mizo tawng hlutna tlahniam zel tih tawp a nih theih nan leh Mizo tawng dik hman a nih theih nan theihtawpa hmalak ni rawh se tih chu pawm a ni.
9. Mizoramah hian Land Reform kalpui a nih theih nan Central YMA-in hma la rawh se.
10. Mizo hnuchhamte hnamdangin fa-a an lâk loh nan YMA-in hma la rawh se tih chu pawm a ni.
Sawrkar khawih bikah hengte hi pawm a ni bawk :
1. Mizoramin Market Regulation kan neih theih nan hmalak ni rawh se tih chu siamremin ‘Mizoramin Market Regulation’ kan neih hi a taka kal pui a nih theihnan hma lak ni rawh se tih chu pawm a ni.
2. Mizoram mipui ten tangkai zawk leh awlsam zawka kan chhawr theih turin, Mizoram hmun hrang hranga sawrkar damdawi In te hi hmanraw tha zawk leh thawktu tam zawkin sawrkarin thuam tha rawh se. A enkawl kawngah pawh tun aia khauh zawk leh tha zawka kal pui ni rawh se tih chu pawm a ni.
3. Myanmar atanga raltlante, hmun hrang hranga awm darh hian harsatna lian zawk min la thlen thei dawna a lan avangin, Sawrkarin Relief Camp changtlung zawk siam tur leh chu miah chuan dah vek tura hma la turin sawrkar lamah Central YMA-in hma la rawh se tih chu pawm a ni.
4. Mizoramah Vocational Course zirna hi tun aia uar zawka kal pui ni rawh se tih chu pawm a ni.
Fabian Lalfakawma, Treasurer Central YMA chuan Central YMA Budget 2022-2023 ruahmanna a pharh a, kum 2022-2023 Central YMA Budget atan Rs. 1,68,80,400.00 pharh a ni a. Rorel palaite chuan an pawm bawk.