Tripura a awm Tuikuk, Mizoram chhung Electoral Roll atanga paih tura tih zingah, Mamit District chhung Assembly Constituency pathum Electoral Roll atanga paih tur zingah voter 4950 zet an la awm a, heng mite hi electoral Roll atanga paih hna thawh mek a ni.
Pu V.L. Remliana District Election Officer chuan Kum 2020 a kil li atanga inremna awm tawh angin, Mizoram Electoral Roll a la awm Tuikuk, Tripura a la khawsa tlat site hian Tripura State chhungah khua leh tui nihna nei vek tawh tura ngaih an nih thu a sawi a, hetiang a nih avang hian inremna anga electoral Roll atanga paih tura hmalak a nih thu a sawi.
Heng Tuikuk voter 4950 zette paih an nih theihna tura hmalakna kal mek ah, hun tiam ni 15 chhung nghah a nih hnuin dodalna a awm lo a, nizan dar 12 atang khan electoral roll atanga paih hna hi thawh tan a ni a, darkar 24 chhunga thawh zawh vek tura tih a ni.
He thu buatsaih lai thleng hian voter 4950 atanga hmun thuma then hmun hnih vel zet chu paih an ni tawh a, darkar 24 chhunga zawhfel theih an beisei thu Pu Lalsanglura Election Officer chuan a sawi niin Mamit Times chuan a tarlang.
