Vawiin dar 11:30 khan Aizawl DC office-ah Electoral Roll Revision 2023 neih turah thil pawimawh hrang hrang sawi ho a ni a, Aizawl District chhunga Electoral Registration Officer (ERO) leh Assistant Electoral Registration Officer (AERO) bakah District Research Officer (DRO) te chu Aizawl District Bawrhsap Dr.Lalhriatzuali Ralte, IAS hovin an thu khawm.
He hunah hian Electoral Roll Revision 2023 neih tura ruahmanna hrang hrangte sawi ho a ni a, Election Commission of India (ECI) in hun bithliah a siam dan chuan ni 9/11/2022 ah Draft Roll tarchhuah (publish) tur a ni a, ni 9/11/2022 atanga ni 8/12/2022 chhung hian dilna hrang hrang (kum tling thar, roll siamthat ngai, paih ngai leh in sawn) thehluh hun a ni a, ni 5/1/2023 ah Electoral roll thar ber tihchhuah tur a ni.
Ni 9/11/2022 atanga ni 8/12/2022 chhung hi dilna thehluh hun chhung ni mahse, Election Commission of India chuan ERO te chu ni 9/11/2022 atang hian dilna (forms) hrang hrang lut te chingfel nghal zel tura a beisei avangin Electoral Roll hearing hi AERO leh ERO ten ni 16/11/2022 atanga tan nghalin ni 30/11/2022 thleng an nei dawn a ni.
Hearing nang hman lo te tan an dilna (forms) chingfel turin AERO leh ERO te office ah hun tiam chhungin ruahmman siam chhunzawm a ni ang. Hemi tur hian dilna siam tur te chuan hun tiam bawhpelh lo turin a hma thei ang berin mahni bialtu BLO kaltlangin dilna lo siam lawk vek tur a ni.
Meeting ah hian Birth certificate chungchang pawh sawilan niin roll a lut thar turte kum finfiahna rintlak ber chu Birth Certificate a nih avangin Roll hearing ah hian Economics & Statistics Department nen thawh ho ni se, Birth certificate rinhlelhawm leh fel hlel deuh nia lang chu ERO leh AERO ten Economics & Statistics Department ah enfiah tura thlen zel ni se tih a ni.
Birth certificate pek chhuah chungchangah pawh India khua leh tui dik takte hnenah chauh dik taka pek chhuah a nih theih nan rawtna hrang hrang lut te chu a khawihtu department hnenah ngenna siam ni se tih rel a ni bawk. Tin, mipuite pawh hemi kawngah hian theihtawpa Sawrkar tawiawm zel tur leh finchhuah zel turin meeting chuan a ngen bawk a ni.
