Nimin tlai lam dar 4 bawr vel khan Lawngtlai AOC Venga electric current siama hnathawk, Pu Francis Rochungnunga (30), Lineman (MR) chu electric current man avangin a boral.
Tarlan tawh angin nimin (Nov 3, 2022) tlailam dar 4 vel khan Power & Electricity Department, Lawngtlai Division a thawk, Lineman (MR), Pu Francis Rochungnunga, Lawngtlai College Veng chu AOC veng a Power line a siam laiin Electric current in manin, District Hospital panpui anih hnu-ah a boral.
Pu Francisa hi Lairam Isua Krista Baptist Kohhran Thalai Pawl, Zion Unit Assistant Secretary nilai a ni a, a nupui leh a fate pahnih a kalsan a ni.
Pu Francis-a thihna avang hian Lawngtlai khawpuia thalai leh nu leh pa te thin a rim hle a. Nizan zantir lam atang khan Power & Electricity Department, Lawngtlai Division Office tualah mi thahnem tak an pungkhawm a. Pu R. Lalzirliana’n Pu V. Zirsanga, Chief Executive Member, LADC kaltlangin he thilthlenga mawhphurtute chu vawiin chhun dar 12 rik hma ngeia an chunga action lak anih tur thu a rawn sawi a, buaina liantham a thleng lo.
Nizana P&E office tuala punkhawmna-ah hian Pu Hc. Vanlalruatpuia, President, Central YLA chuan tunhnaiah Lawngtlai district a electric man avanga mi 4 zetin nunna an chan tawh thu sawiin, a zan la la hian he thilthlenga mawhphurtute chu sorkar-in ban nghal rawh se, a ti a. Nizan vek khan CYLA hruaitute leh sorkar thuneitute inbia-in sorkar lam chuan a theih ang a chaka hmalak a intiam a. Zan lam thil te anih avangin sorkar tan chet leh hmalak a har avangin CYLA hruaitute leh Lawngtlai mipuite chu vawiin dar 12 thlenga nghak hram turin an ngen a. CYLA leh khawtlang hruaitute chuan sorkar thu ang a vawiin dar 12 thleng nghah phawt an remti a, an thil phut te sorkarin anih ang anga a tihlawhtling lo anih chuan engpawh thleng sela a mawh an phurh loh tur thu sawiin pungkhawmte hi an tindarh ta a ni.
Nizana inbiakna-ah hian Pu R. Lalzirliana, Minsiter, Power & Electricity changtu chuan sorkar chuan a theih ang a chak leh rangin he thil thleng hi a chhui chiang nghal ang a, vawiin chhun dar 12 hma a a chhui tura ruatte hian report an thehlut hmanlo anih chuan anmahni pawh suspend nghal an ni ang, a ti.
He thihna thleng avang hian nizan la la khan YLA College Veng branch te chuan thuchhuah siamin Pu Francis-a vanduaina tawh chungchangah, he vanduaina thlen hunlaia Control Room a duty hi ban ngei ni rawh se, an ti a. Tin, helaia mawhphurhna latu, SDO leh JE te pawh an ban ngei an phut.
Heng bakah hian sorkar chuan Pu Francis-a nupui fanaute hnenah zangnadawmna pek an phut bakab Pu Francis-a nupui chu amah leh a fate inchawmzuina atan department-ah a thawh awm tawk hna pe ngei turin an phut bawk.
Cheural branch YLA te pawhin an khaw pa leh an member, Francis Rochungnunga vanduaina tawh chungchangah hian thuchhuah an siam ve bawk.
Hetihlai hian Lawngtlai West bialtu MLA, Pu C. Ngunlianchunga pawhin Power & Electricity changtu Minister, Pu R. Lalzirliana hnenah lehkha thawnin, tunhnaia Lawngtlai district a Electric current man avanga mi 4 zetin nunna an chan chu a rilru nat thlak thu sawiin, heng thilthleng chungchangah hian Magisterial Enquiry kalpui ni sela, vanduaina tawk chhungte hnenah hian zangnadawmna pek ngei ni rawh se, a ti a. Tin, Pu Francis-a nupui hnenah hian zangnadawmna, pawisa fai leh hna (Compassionate appointment) pek ngei ni rawh se a ti bawk.
Sawi tawh angin Oct 14, 2022 khan Lawngtlai district chhunga Rulkual khua a mi 3 te chuan hnatlanga P&E hnathawk an puihna lamah electric current man avangin nunna an lo chan tawh bawk a ni.
Heng mai bakah hian tun kum reilote chhung hian Lawngtlai district-ah hian electric current avanga chetsualna neuh neuh a thleng tam hle a, kan thudawnna pakhat chuan tun kum 2 emaw chhung lek hian Lawngtlai district-ah hian electric current man avangin mi 6 zetin nunna an chan tawh a, chetsualna tenau neuh neuh phei chu a thleng tam hle a ni a ti.
