Kawrthah Zone Football Tournament final chu nimin khan Kawrtethawveng-ah khelh a ni a. Lalrindika Ralte, MLA, Hachhek Constituency chuan khuallian niin a hman pui.
First Division final khelh hma a inkhawm tawi buatsaihah Lalrindika Ralte, MLA chuan thu sawiin, “Kan tum phawt chuan Mizo thalaite hian hlawhtlin theih lohna chhan tur pakhatmah kan nei lo. Hnahthial tlangval Jeje-a tana Pathian a rinawm ang hian Hachhek bial mipuite tan hian Pathian hi a rinawm ve bawk a ni tih hriat a tha. Engkim ti theitu Pathian hi a fair tawk. Malsawm tlak, hlawhtling tlak kan nih chuan kan hmalamah hian hlawhtlinna a awm vek a ni. Rinawm taka kan awm chuan vawiin a player-te hi Indian Football captain kan ni thei vek. Hlawhtlinna atana pawimawh ber chu chhungril lam inpekna hi a ni. Kan ngaihtuahna in pha ve mah se, chhungril a inpekna tak tak a awm loh chuan a hlawhtlin theih loh. Ballboot tha, jersey nalh leh playground thate nei mah ila, chhungrila inpekna tel lo chuan hlawhtlinna a awm thei lo. Hawh u, Hachhek bial thalaite hian eng nge kan nih tih hi khawvel hi i hmuh tir tak tak ang u. A pawimawh ber, Pathian tihna nena theihtawp chhuaha hlawhtlin tum rana hmalam pan turin duhsakna ka hlan a che u,” a ti.
Pu Lalrindika Ralte tawiawmtu Jeje Lalpekhlua, India team captain hlui pawhin thu sawiin, “Thinchhiat hi infiamnaah hlawkna a awm lo a, a tuartu chu keimahni kan ni zel. Hlawhtling tur chuan beidawng lo a beih a ngai. In tum tak tak chuan tih theih loh in ni tih hre reng ang che u. Ground neih that loh te hi chhuanlam tur a ni lo, mahni inah pawh a zir theih. Kei ngei pawh hi Academy-ah ka kal lo, kan in bul field atanga inpetchhuak ve mai ka ni. Beidawn chang, tah chang ka ngah; mahse, ka beidawng ngai lo. MPL-ah pawh kei aia thiam an tam, mahse thiam tak takte thlen phak loh hi thawhrimna avangin ka thleng ve tlat a ni. Training zawha ball ka la a, Goal ruakah ka pet tlauh tlauh thin. Mizote hian induhsakna hi kan sawi nasa thin a, min duhsak loh vangin min khelh tir ve lo te kan ti thin. An khelh tir loh theih loh khawpa tha a inchher mai tur. A thiam tak tak chu tuman an drop thei lo. Phone khawih nasat lutuk hi a pawi thei hle a, zuk leh hmuamah fihlim tur a ni bawk. Zuk leh hmuam tih duh chuan inkhelh ve loh mai tur. Tin, tournament-ah hian sum leh pai tih tam kher a ngai lo; tournament hi awm zing se a fuh zawk,” a ti.
Kawrthah Zone Football Tournament-ah hian team 16 an tel a. First Division-ah team 9 awmin, Second Division-ah team 7 an tel a. First Division-ah hian Kawrtethawveng an champion a, Second Division-ah W. Bunghmun an champion bawk. Kawrthah zone-ah hian khaw 19 a awm a, khaw 9 chu First Division team niin second division-ah khaw 11 an awm bawk. Tournament atana an mamawh tam zawk hi bialtu MLA-in a tumsak vek a ni.
Pu Lalrindika Ralte, MLA hian June 2, 2022 atang khan a bial, Hachhek Constituency a South block huamchhung khaw 12 tlawh tawhin vawiin hian a zo fel a. Hun remchang hmasa berah Central Block leh North Block lam a tlawh leh ang.
