Vawiin hian Lalruatkima, I&PR Minister chuan North Serzawl MSU Sub Hqrs. Silver Jubilee lawmna hun khuallian niin a hmanpui.
Khuallian chuan thusawiin, “Zirna lama hma kan sawn theihna tur leh ram leh hnam tana nghet taka ding ṭhin zirlai pawl Zoramin kan nei hi a lawmawm tak zet a ni,” a ti a. “Engkima hmasawnna kawng bul ṭhut chu Zirna hi a ni a. Chuvangin, vawiina lokal khawmte hian zirna i uarin i ngai pawimawh zel ang u,” a ti bawk.
Lalruatkima chuan, zirna ngai pawimawhtu Pu Lalchhandama Ralte bialtu MLA ṭha tak an nei chu lawmawm a tih thu a sawi a. “A sek apiang, a chak apiang dinchanna khawvelah kan cheng ṭhin a. Hun a kal zel a, ‘a ruh no no chhuakah’ tihna khawvelah kan cheng chho ta a. Tunlai khawvelah chuan lehkha thiam apiangte dinchanna khawvelah kan cheng ta mek a ni. Eng hna pawh thawk dawn ila, a mawi tawk lehkha thiam a pawimawh a, kut hna kan thawk dawn a nih pawhin lehkhathiam a pawimawh tho a ni,” a ti.
I&PR Minister chuan, “Kawng engkimah taimakna leh beih ṭang ṭangna a pawimawh a. A peih leh a taima tan chuan thawh tur a tam em em a ni. Chuvangin, kawng hrang hranga dingchhuak tur chuan tumruhna leh taimakna kan neih a ngai a ni. Central service-ah Mizo tling kan tlem ta em emte hi a veiawm em em a, zirlaite’n ṭan kan lak a ngai nasa hle a ni,” a ti bawk.
Minister chuan, “Mizote kan la tlem em em a, fa nei tam turin kan inzirtir a ngai a ni. A hnam anga kan dinchhuahna tur te, hma kan sawn zelna tur atan kan tam a ngai a ni. Mizote i inthlahpung chak ang u,” a ti bawk.
He hunah hian MSU General Hqrs President Samuel Zoramthanpuia pawhin thu a sawi a ni.
Silver Jubilee lawmna hun hi Lalsangzuala Sailo, N Serzawl MSU Vice President-in a kaihruai a ni.
