Vawiin February ni 4, 2025 (Thawhlehni) hian Village Council inthlan lo awm tura campaign mek MNF Senior Vice President Dr.R.Lalthangliana chuan Hnahthial, Cherhlun, Thingsai, Khawhri, Tarpho, S.Chawngtui, Aithur leh Bualpuite tlawhin party mite nen inkawmhona an nei.
Dr.R.Lalthangliana chuan ZPM sorkarin VC term thla ruk zeta a pawh tawi court-a khinna thutlukna chu hriat la ni lo mahse; MNF chuan engtik hunah pawh VC leh LC inthlan chu an in rin reng thu leh an huphurh loh thu a sawi.
Dr.Thangtea chuan, “VC leh LC tan hian central sorkarin ruahmanna fel tak siam sain state sorkarah sum a rawn pe thin a, central-in VC-te tana sum a rawn pek hi state sorkarin an rawn pek atanga ni 15 chhungin a changtu tur VC hnenah a pek ngei a ngai a, a pe lo a nih chuan hremna atan a pung awmin VC-te hnenah sum hi a pek tho tho a ngai a ni. Chuvangin, kan khawtlang enkawl tur hian ruling party VC kher neih a ngai lo tih i hria ang u,” a ti bawk.
MNF Senior Vice President hi heng a tlawhna khuaah te hian party mi leh saten an lo dawngsawng thain Village Council inthlan lo awm turah chak ngei an inring a, an phur hle a ni.
