Social Activist Vanramchhuangi (Ruatfela nu) chuan NHIDCL-ten Mizoram hmun hrang hranga kawngpui an laih meka Environment an tihchhiat nasat lutuk chungchanga mawhphurtu chu District tina DC-te an nih thu leh an inthlahdah vang a ni tih a sawi.
Vawiin (3.6.2022) khan Vanramchhuangi, Serchhip Thalai Pawl leh Lunglei Thalai Pawl chuan Serchhip Press Club-ah thuthar lakhawmtute a kâwm a, hetah hian Vanramchhuangi chuan kum 2020 aṭanga NHIDCL-ten Mizoram hmun hrang hranga kawngpui an laih vanga leivungin thing leh mau a tihchhiat chu chhiarsen a ni lo tih sawiin, leivung hian kawrte (perenial & seasonal river) pawh 100% a chhilh bo vek a, heng kawrtea leivung inchhekkhawlte hi luipuiah luang lutin chirh a inchhekkhawl a, lui dunga nungcha tam takten an thih phah tih a sawi a, heng zawng zawng hi siamṭhat an phut tih sawiin, an hnathawh lai chawlhsan tura an nawrnaah Environment, Forest & Climate Change Department chuan hmun ṭhenkhatah stay order an pe tawh tih a sawi a, hetihlai hian he hna vil (monitoring) kawnga mawhphurtu tura ruat District Bawrhsap-te chu an inthlahdah a, compensation ringawt an buaipui a, a vil zui kawngah an ṭha tawk lo hle a ni, a ti a, Stay order pek ringawt hi a tawk lova, kan Environment an tihchhiat siamṭhat a nih theih nana sawrkar hmalak dan chu enzui zel a ngai dawn a ni a ti.
Nimin, Ningani-a Tuikum lui hnâr lama kawng laih an tlawh chungchang pawh sawiin, Tuikum luiah leivung tam tak a lut dawn tih chiang a, Zawlpui phaia leilet neitute pawhin kawng laih ṭan hma-in hemi chungchanga harsatna thleng thei tur chungchanga hmala tura ngenna District Bawrhsap hnena an lo thlen daih tawh laia tun dinhmun an thleng leh si chu hemi kawnga mawhphurtute demawm a tih thu a sawi bawk.
NHIDCL-ten Mizo mipuite hmusit taka min namnul chungchanga sawrkarin hma lakna a neih loh chungchangah hian “Min zah loh chhan an nei a ni mai,” a ti a, NGO ṭhenkhatte pawhin NHIDCL sum bawm an zenpui nia an hriat thu sawiin, “State sawrkar phei chu nga sa an ni,” tiin a sawi a, hemi chungchang hi an zirchian mek thu leh evidence an neih hunah tlangzarh an tum thu a sawi bawk.
Tlawng hnara environment tihchhiat chungchangah National Green Tribnal (NGT)-ah an zualko mek tih pawh sawiin, Serchhip leh Keiṭum inkar kawng laihna leivung chu Zawlpui phaia a liam thlak chuan Mizoram buh leh bal thar chhuahna hmunpui ber Serchhip Zawlpuiin a tuar nasa dawn hle tih a sawi a, hemi chungchang pawh hi High Court-a thlensak nghal hial a duh thu a sawi a, India Judiciary pawh 100%-in Environment lamah a ṭang tih sawiin, Ukil-te pawhin an support hle tih a sawi a, hemi kawngah hian state mipuite pawh an ṭhanharh a ṭul hle tih a sawi.
He hunah hian SṬP-in Save Tuikum & Mat Project a kalpuia Project Co-ordinator Laldinpuia leh LTP Chief Organiser Lalduhawma Pachuau-te pawhin NHIDCL-ten kawng leih hna an thawhnaa dân lo ang hna an thawh dan hrang hrangte an tarlang bawk a ni.
Hemi hnu hian Vanramchhuangi-ho hian SṬP leh LṬP hruaituten Serchhip District Bawrhsap pisa tualah NHIDCL kawng laihin environment a tihchhiat nasat vanga hma la tura DC phûtin lungawi lohna an lantir a, SṬP chuan Serchhip DC hnenah NHIDCL-ten dân bawhchhiaa kawng laih hna an thawhnaa action la tura ngenna lehkha an thehlut nghal bawk a ni.
Ruatfela Nu hian nimin (2.6.2022) chawhnu khan Serchhip rawn thlengin, Serchhip Ṭhalai Pawl (STP) hruaitute nen inkawmhona an neih bakah Serchhip chhehvela NH-54 kawngpui laih zauh hna thawk mekte tlawhin, an leivung paihdante an enho nghal a ni.
