MPCC President Lalsawta chuan, “Khawvel hnam tin hian ram leh mipui kan nei vek a, he thil lian tak tak pahnih hi ram hruaitute’n an hman leh enkawl dan a zirin ram chu a nuamin a hrehawm thei a ni. Chung thil pahnihte hmang ṭangkai a ram rorelna tha neia mi taima leh rinawmte dinchhuahna siam tur chuan ram mipui rilru siam tha thei zawng leh an ngaihsan zawng kan thlak hi a pawimawh hmasa em em a ni. Tin, Environment tichhe lo zawng a hmasawnna hi kan kalpui a ṭul a ni,” a ti.
Vawiin August 11, 2022 (Ningani) hian Lal Thanhawla Auditorium-ah Mizoram Pradesh Mahila Congress-te chuan Political Training cum Intuaitharna hun hmangin, MPCC President Lalsawta leh Professor Zokaitluangi, MZU-ten thu an sawi a, intuaitharna inkhawm hi MPMCC President Vanlalawmpuii’n a kaihruai a, Lalremsiami MPMCC Vice President in ṭawngtainaiin bul a ṭan a ni.
“Mipui thawhkhawm Sawrkar sum hi mipuite dinchhuahna tur a hmanraw pawimawh ber pakhat a ni a, ram roreltuten an thuneihna leh mipui sum chu mahni hausak nana hmang lo va, an rawngbawl sak mipuite’n eizawnna ngelnghet, ram changkang, nuam leh him siam nan an hman a ngai a ni. Congress sawrkarah khan mipui leh kohhrante duh loh zawng takin thil kan ti niin ka hria a, a pawi ka tiin kan tihsualah ngaihdam kan dil a. Vawiin hian kan ramin Congress a mamawh tih hriain rilru thar neiin kan insiamtha chho mek a ni. Mizoram mipuite pawhin kan hun liam tawh a kan tlin lohnate min theihnghilh sak a, sawrkar tha siam kan tum hi theihtawp a min thlawp turin kan ngen tak meuh meuh che u a ni,” a ti bawk.
Prof. Zokaitluangi, Mizoram Universiry pawhin thu sawiin, “Ram hruainaah hian hmeichhiain bul kan ṭan a ngai a, bul kan ṭanna tur chu Lalpaah ni thung se, Lalpa au chung in Israel fate ang khan a thu ang zel a kaihruai tur in hma kan lak a ṭul tak zet a ni. Congress chu Party puitling in ni a, midangte entawn tlak ni tur a in kal hi a ṭul a ni. Ram siamna hi eizawn nana hman tum kan awm ṭhin a, Congress nu hoin ram leh hnam siam nan a Party hman in tum hi ka duh tak zet a ni. Hmeichhiate hian kan society-ah hian tih tur kan ngah em em a, thil tha chu kan hre vek, chu thil tha chu midang tih tur a dah lo in keimahniin kan tih a, bul kan ṭan hi a ṭul a ni. Kan ram hi a na a, tih takzet a siam thatna duh tu kal khawm in ni in ka hria a, siamtha tur hian Ṭawngṭaina a bul ṭan turin ka sawm tak zet che u a ni,” a ti bawk.
He hun kaihruaitu MPMCC President Pi Vanlalawmpuii Chawngthu pawhin thu sawiin, “Vawiin a lo kal khawmte hian ram leh hnam siam kawngah keini chu kan harsa em mai emaw, keini chu kan hmeltha ve si lo emaw ti tur kan ni lo a, ram leh hnam siamtha tur chuan véi hi a tawk a, hausak leh retheih emaw hmelchhiat leh that emaw a ni lo; tih tak zet a ngaihtuah a, kan ram siamthat duhna thinglung kan put a, kan ram kan vei na hi a tawk em em a ni,” a ti bawk.
