Vawiin August ni 26, 2022 Zirtawpni hian Mizo Hnam Runah chhung inkhawm hun hman a ni a, he hunah hian Pu K. Riachho (IAS Rtd) MNF Gen. Hqrs Adviser chuan thu a sawi.
Pu K. Riachho chuan, “Opposition lam ten kan ram dinhmun chhe lutuk leh sum dinhmun harsatna avanga buaina namenlo thleng mek leh lo thleng zel tur anga an sawi hi a thlen dikloh zia a lo lang zel a. Pathian au reng ṭhin, Pathian leh kan ram tan tih changvawntu kan hruaitute chu a hun takah Pathianin a pui zel a ni,” a ti a. Mipui nawlpuiin kan state budget chungchang kan hriatfiah tawk lohna chu eptuten hmang tangkaiin, sawrkar tih mualpho an tum a, mahse hei hi kan hruaitute thawhrimna avangin a hlawhchham zel a ni, a ti bawk.
Pu K. Riachho chuan budget chungchang a sawifiah a. State leh Central budget inlaichinna hrang hrangte leh state chanvo te chu India danpuiah chiang taka tarlan a ni a. Chumi piahlama kan hruaitute thawhrimna leh inpekna avanga kan sum hmuh hi a chhuanawm em em a ni a ti. Central budget-ah englai maha la lang ngai lo, Mizoram state ta tur liau liau 600 Crs. lai mai a lo lang te hi a chhinchhiahtlak takzet a. Kan hruaitute inpekna leh remhriatna a fakawm takzet a ni, a ti.
MNF Adviser chuan, sum enkawl thiam ti a an sawi ten sum an enkawl laiin, vanneihna tam tak an tawk a. Tun hnua an tihtawp tak non lapsable pool fund te an hmu a, chuti chung chuan sum an harsat luat avangin zu an zuar hial a ni, a ti. Hripui leng avang leh ramri buai avanga sum hmuhtur ang hmuh a ni lo a, sum hmanna tura ruahman lawk ni loah sum tam tak hmanral a ni a. Chuti chunga harsatna liantham kan tawklo leh sawrkar hnathawk ten hlawh an la thei hi, kan hruaitu sum enkawl thiamte thawhrimna a ni, a ti bawk.
Hnam Run chhung inkhawm hi Pu Lalringliana, Executive Councillor, AMC, Adviser, MNF Gen. Hqrs. ni bawk chuan kaihruaiin, Pu Rochungnunga, Adviser, MNF Gen. Hqrs.-in hunserh a hmang a, Gen. Secretary pahnih hnen atangin an department chana an hmalakna report ngaihthlak a ni bawk.
