Everhome Pro Volleyball Leaque 2025 chu nizan atangin @ LPS Arena, Falkland ah neih tan a ni a. April 29 (Thawhlehni) Zan khan Tuichangral leh Thutak Nunpuitu Team (mipa) chuan bul tanin, = 20-25, 25-23, 25-21, 25-22 in Tuichangral an chak a. Kuriz Player of the Match-ah = Rajneesh Singh (Tuichangral) chu thlan a ni.
Mizorama a inkhelh vawi khatnaah Rajneesh Singh chuan Tuichangral tanpuiin, EverHome Pro Volleyball League inkhel hmasa berah set thum set khatin rin hlawh Thutak Nunpuitu Team an hneh.
Thawhlehni zan khan Mizoram volleyball inelna sang ber tan a ni a, LPS Arena, Falkland-ah a khatin mipui an pung khawm nghal. A tir lamah TNT-in an khel tha a, set hnihna atangin Tuichangralin hriam leh mar takin an khel tluan a, 20-25, 25-23, 25-21, 25-22-in an chak.
TNT-in inelna hrang hranga an inkhelh hnuhnun vawi hnihah Tuichangral an hneh ve ve a, khaw chhak team-in tum thum tlawm zawn pumpelh tumin Uttar Pradesh player Rajneesh an la lut. Ani hian an chak theih nan point 35 hmuin 15 a hloh a, Kuriz Player of the Match lawmman a dawng nghal a ni.
R Vanlalmawia’n point khat chiah hlohin point kua a hmu a, Tuichangral player zinga Rajneesh thlawp thei ber niin Biakmuana’n tum sarih vaw tlain vawi thum a tisual a, nikum Pro Volleyball best spiker Zomuansanga’n point riat a hmuh aia tam 12 a paih ve thung.’
March khan Lungleiah Mizoram volleyball inelna sang ber dawttu MVA Cup-ah phu takin TNT an champion a, final-ah Tuichangral an hneh. Pro Volleyball atan player kawl sa bak langsar tham lak belh an nei lo va, a vawi hnih nan Mizo hlanga champion an tumna kawngah tun dinhmuna an elpui lian Tuichangral laka chak thei turin bul an tan.
Mahse, an tlo tawk lo. Hun pawimawh leh inelna sangah Rajneesh el thei khawpin an player-te an inlan zo lo va, Mizo blocker tha Zosangzuala (Lalmama) chuan thawh hlawk berin point 16 a hmuh laiin tum thum a tisual a, Vanlaltanchhana a che tha tawk lo a, vawi 10 vaw tlain point hnih a paih a ni.
TNT tan Pro Volleyball-a a inlan hmasak berah Saidingpuia Sailo chuan vawi 13 hlap tlain point li a hloh a, a tir lamah a vuak tlak zawn chhoh hnuin inkhel an thunun a; K Zodingliana’n a hlap tlak hnuah service atangin point a hmu zui a, set khatnaah 10-4-in an sang.
Tuichangral an insiam rem mai lo va, captain Lalbiakmuana’n a vuak kai loh hnuah 17-9-in TNT-in hma an hruai zui leh. Rajneesh chuan tha taka a service atangin point hmu zawn mah se a tisual chhunzawm a, 24-20 a nih laiin Saitea’n a hlap tla a ni.
Set an hloh hnuah Tuichangralin paukhauh zawkin an khel zui a, inchawm tawnin kawng dikah an kir a, TNT-in an insawrbingna hloh then ve thungin Saitea leh Valbuanga’n vaw sual zawnin 5-1-in set hnihna tirah khaw chhak team an sang.
A hnuah Sadrak Fanai chuan hlap tlain 20-20-in TNT-in an nih rual leh na a, Rajneesh chuan vaw tla ve nghalin Tuichangralin Valbuanga hlap an dansak bawk a, point hniha kalsanin 24-22-in an sang. Rajneesh chuan service sual zui mah se Valbuanga’n hun pawimawhah a service sual ve leh a, khaw chhak team-in set an lak rualin hnehna kawng an zawh chhunzawm.
Set thumnaah pawh a tawp lamah Tuichangral an hriam a, 17-17 atangin Uttar Pradesh spiker-in a hmaa ball chhuak a hlap tlak zel laiin TNT rinrawlten chet an harsat. Saitea’n line pawna a vuak chhuah hnuah Valbuanga hlap an dang tla a, Tuichangralin hma an hruai tluan.
22-21-a hniam zawk an nih laiin TNT-in point thum an hloh zawn a, Sadraka’n service sualin Saitea’n point hnih a hloh zui a, a vuak net bula an dansak hnuah line pawnah a hlap chhuak bawk.
Set hnih an hloh zawn hnuah kir leh tumin TNT-in an nawr let a, Valbuanga’n tha taka a service atanga point a hmuh hnuah Saitea’n vaw tlain 17-11-in set linaah hma an hruai. Mahse, Tuichangralin nungchang ropui lantirin Rajneesh bakah Mawitea’n net bulah rin tlakin a khel a, Zomuana’n a hlap tlak rualin 19-19-in an nih rual.
Tuichangralin inrintawkna an nei sang zawk tih lantir zuiin 22-22 a nih leh hnuah Valbuanga vuak an dang tla a, Rajneesh chuan hlap tla ve thungin TNT tan tihsual a thiang tawh lo a, mahse, Saitea’n vaw kai lovin set thumna ang bawkin a tawpah Tuichangralin point thum an hmu zawn leh a ni.
A vawi khat nan Pro Volleyball champion nih an tumna kawngah khaw chhak team-in rahbi pawimawh an tuk nghal a, chutih laiin an elpui lian TNT an hneh theihna chhan lian tak Rajneesh chuan khel zui lovin Uttar Pradesh-ah volleyball thil vang thovin a hawsan dawn a, a lo kir leh ang em tih an hre thei rih lo.
STATS
TUICHANGRAL
Rajneesh Singh : point hmuh 35, point hloh 15
R Vanlalmawia : point hmuh 9, point hloh 1
Lalbiakmuana : point hmuh 7, point hloh 3
Johan Vanneihsanga : point hmuh 4, point hloh 4
Vanlalṭanpuia : point hmuh 5, point hloh 6
Zomuansanga : point hmuh 8, point hloh 12
TNT
Zosangzuala : point hmuh 16, point hloh 3
Saidingpuia Sailo : point hmuh 13, point hloh 4
Vanlalṭanchhana : point hmuh 10, point hloh 2
Sadrak Fanai : point hmuh 7, point hloh 1
K Zodingliana : point hmuh 6, point hloh 1
Lalsaitluanga Sailo : point hmuh 2, point hloh 1
FIXTURE : LEAGUE ROUND
APRIL 30, 2025 (NILAINI) – 8:00 PM
Khawbel v Hunthar (mipa)
MAY 1, 2025 (NINGANI) – 8:00 PM
Sihphir v Anastasia Electric Veng (mipa)
