Everhome PRO Volleyball Leaque 2025, LPS Arena, Falkland-a khelh mekah May 7 (Nilaini) Zan chu hetiang hi a ni.
Tuichangral def Khawbel (mipa)
= 25-23, 25-22, 25-20 (3-0)
Kuriz Player of the Match
= Rajneesh Singh (Tuichangral)
Khawbel kal tluang titawpin kawng dikah Tuichangral an kir a, nilaini zan EverHome Pro Volleyball League-ah set thum faia an chak rualin table-ah an sang ber.
LPS Arena, Falkland-ah Khawbelin Rajneesh Singh an dang hneh lo a, beisei pha lova vawi hnih a khel zawn hnuah Zomuansanga’n a theihna pangngai lantirin Tuichangral a tanpui bawk a, 25-23, 25-22, 25-20-in an chak.
League inkhel hmasa berah Tuichangralin MVA Cup final-a an hneh loh Thutak Nunpuitu Team laka an tlawmna chhang letin rin hlawh phah a; mahse, talbuai zuiin thawhtanni khan set an lak hmasak hnuah Anastasia Electric Veng an hneh lo a, Khawbel lakah insiam thar leh nghalin a vawi khat nan champion an tumna an tinung thar leh.
A hma leh hnung atangin Rajneesh chuan rin tlakin a khel a, a service tha tak chhawr tel bawkin point 31 a hmu a, 13 hloh mah se mi malin a langsar a, a vawi hnih nan Kuriz Player of the Match-a thlan a ni. Zomuana’n tha takin a thlawp a, vawi 13 vaw tlain tum nga a tisual.
Pro Volleyball-a an tel vawi khatnaah Khawbelin boruak an nei hman a, an khelh hmasak vawi hnihah set hloh lo ve vein Hunthar leh Sihphir an hneh zawn. An player pawimawh leh fak hlawh Ashwal Rai chuan team pum pui a chawi kang a, khelh hnihah point 53 hmuin 10 a hloh.
India team-a tel turin Mizo club a chhuahsan a ngai a, ui takin Khawbelin a thlah liam. A aiawh turin India Under 21 team-a khel tawh Tanish Choudhary an la lut a, a hova an khelh hmasak berah Tuichangral nen inhnehtawk viau chungin set la tur khawpin an el zo lo.
Tanish hian tum 20 vaw tlain point kua a paih a, Sihphir an hneh tuma che tha Lalruatfela Sailo chuan point thum a hmuh aia tam point li a hloh. Rodingpuia’n point khat chiah hlohin tum kua a hlap tla na a, Mizo player-ten a hma an pha lo hlawm a, thlen san an inbeiseina a tla hniam tel nghal.
Vawi thum ve ve an khelh tawhah tum hnih ve ve chak mah se Khawbel aiin Tuichangral an sang a, table chung berah an insawn chho. Khaw chhak team hian phurna leh inrintawkna thar nen kar leh thawhtanni zanah Hunthar an khelhpui dawn a, inrinni zanah Khawbelin an khelh hnuhnuna che tha Anastasia an hmachhawn ve thung ang.
Khawbel hmaah Tuichangralin a tir atangin hma an hruai a, R Vanlalmawia’n an inkhelh chhungin point khat paihin tum ruk a vaw tla a, set khatna tawp lamah rang taka tum hnih a vuak tlak hnuah 22-16-in an sang.
Khawbelin nawr letin Tanish chuan Vanlaltanpuia vuak a dansak hnuah Zomuana hlap tum hnih a dang zawn a, ama’n vaw tla zui bawkin 22-21-in an inkar an tizim a, 24-23 thlengin an hnaih chho zel. Mahse, kutthlak na tak Rajneesh-a vuak an dang zo lo va, set khatnaah Tuichangral tan point hnuhnung pathum thawk chhuakin deuce ngai lovin an tlang.
Set hnihnaah pawh 20-20 thlengin an intluk a, Rajneesh chuan hlap tla zawnin Tuichangralin an kalsan. 24-22-a hniam zawk an nih laiin Khawbelin hnaih thei turin Ruatfela’n a vaw tla zo lo va, Rajneesh chuan set an lak zawn nan chiang takin a hlap tla ve thung.
Tuichangral tan boruak sangah Uttar Pradesh player a pawimawh a, a hma leh hnunga a awm lai pawhin setter C Zonunmawia’n ball a pe tam. Set thumnaah Khawhai tlangvai Zomuana’n chiang tak takin a vaw tla tel bawk a, Rajneesh chuan a theihna chiang leh zuala lantir telin Tanish chuan vawi hnih a service a la sual a, 21-16-in hma an hruai phah.
Khawbel an hriam tawk lo a, Tuichangral tan Rajneesh chuan tha taka a khelh rualin a tanpuite a fuih phur tel. Zomuana’n an chak theihna point hnuhnung pahnih hlawh chhuakin inhliam Lalbiakmuana tel lovin chiang takin hnehna an chang a, chutih laiin mi malin Johan Vanneihsanga’n harsatna a tawk a, point nga hlohin vawi khat chiah a vaw tla a ni.
STATS
TUICHANGRAL
Rajneesh Singh : point hmuh 31, point hloh 13
Zomuansanga : point hmuh 13, point hloh 5
R Vanlalmawia : point hmuh 6, point hloh 1
Vanlalṭanpuia : point hmuh 4, point hloh 3
Johan Vanneihsanga : point hmuh 1, point hloh 5
C Zonunmawia (setter) : point hmuh 2, point hloh 5
KHAWBEL :
Tanish Choudhary : point hmuh 20, point hloh 9
Rodingpuia : point hmuh 9, point hloh 1
Lianlunsang Vaiphei : point hmuh 5, point hloh 1
Joseph Lalbiaksanga : point hmuh 3, point hloh 0
Lalruatfela Sailo : point hmuh 3, point hloh 4
H Malsawmsanga : point hmuh 2, point hloh 3
David Lalramhmachhuana (setter) : point hmuh 0, point hloh 1
POINT TABLE
TUICHANGRAL : Play 3, Won 2, Loss 1, Point 6
KHAWBEL : Play 3, Won 2, Loss 1, Point 6
THUTAK NUNPUITU TEAM : Play 2, Won 1, Loss 1, Point 3
ANASTASIA ELECTRIC VENG : Play 2, Won 1, Loss 1, Point 3
SIHPHIR : Play 3, Won 1, Loss 2, Point 3
HUNTHAR : Play 3, Won 1, Loss 2, Point 3
FIXTURE
MAY 8, 2025 (NINGANI) – 8:00 PM
Thutak Nunpuitu Team v Anastasia Electric Veng
MAY 9, 2025 (ZIRTAWPNI) – 8:00 PM
Sihphir v Thutak Nunpuitu Team
MAY 10, 2025 (INRINNI) – 8:00 PM
Anastasia Electric Veng v Khawbel
