Fall Armyworm-in Vanchengpui leh Dulte khua tibuai

Aizawl June 2 : Khawzawl District huamchhung khaw pahnih – Vanchengpui leh Dulte khuaah te Fall Armyworm in Vaimim chingtu chhungkaw engemawzat a tibuai mek a, Vanchengpui khuaah hian FAW hian chhungkaw 30 vel tibuaiin Dulte khuaah hian chhungkaw 15 a tibuai mek a ni.
Thudawn danin Khawzawl District Agriculture Officer B. Ramnunsanga chuan Vanchengpui khuaa Vaimim chingtute FAW in a tihbuai thu hi thla hlui May thla tawp lam khan Report an dawng a, May ni 25 khan FAW kahna tur hian Agriculture Department chuan Emamectin Benzoate pe in, tunlai hian Vaimim huan te an kap mek a. FAW hian ei chhiat ala ngah loh avangin FAW puang mek hi harsatna lutuk tawk lova khuah-khirh theih an inbeisei thu Vanchengpui a vaimim chingtute chuan an sawi a ni.
Nimin chawhnu lam khan Dulte khuaa FAW in a tihbuai chhungkaw 15 aiawhte chuan Khawzawl DAO Office atangin FAW kahna tur damdawi hi an la ve leh a, FAW hian vaimim hnah leh a kung te a ei chhe tan tih an sawi a ni.
Khawzawl District-ah hian Vanchengpui leh Dulte khua te bakah Khawzawl, Biate, Tualpui leh Chawngtlai khuaah te pawh FAW hi hmuh ni mahse vanneihthlak takin tunah hian heng khuaah te hian chhungkaw 2/3 vel bak tih buai a nei lo a ni.
Vanchengpui khuaah hian SEDP hnuaiah Vaimim ching chhungkaw 12 an awm bakah mahni a Vaimim ching chhungkaw engemaw-zat an awm a. Dulte khuaah pawh hian SEDP hnuaiah Vaimim ching mi 15 an awm bakah mahni a Vaimim ching hi mi thahnem tak an awm bawk a ni.