July 3, 2022-a Saikuti Hall, Lunglei a Pu Lalruatkima, Minister thusawi, State finance chungchang kha thudik chanve, data duh chin chiah lachhuaka mipui hruaisual tumna a nih avangin han chip zui hlek teh ang.
Pu Ruatkima khan Congress sorkarin RBI atanga pawisa an puk ve nasat zia hetiang hian a sawi a : “Kum thum chhung (2012-2015) Ways & means-in RBI-ah vawi 118 pawisa puk a ni, kum 2012-2013 atanga kum 2014-2015 (Nov 1, 2014) thleng khan RBI-ah nasa takin sum an puk a ni,” tiin.
(Thlalak kan tarlan atang hian Mizoram leiba pun chhoh dan chu a chiang viau e)
Pu Ruatkima thusawi hi thudik a ni a, mahse, a sawi thlen duh miah loh chu 2015 hnu lam, June 30, 2016 atangin sorkar term tawp 2018 thlengin Congress sorkar khan RBI-ah Ways & Means hmangin pawisa a puk tawh ngai lo tih hi a ni. Congress sorkar khan Pu Lalsawta Finance Minister-na hnuaiah ram sum leh pai dinhmun nasa takin a siamtha a, RBI atanga puk ngai tawh lo khawpin Mizoram dinhmun kha a tha chho ta a ni. Hetiang tur hian Congress term hmasa, Pu H. Liansailova Finance Minister lai khan inrenchem kum te, sum dinhmun sawh ngheh kum (year of consolidation) te puan a ni a, NLUP sem chung khan nasa takin ram sum leh pai dinhmun an siamtha thei a ni. Kan hriat angin Congress sorkar term hnihna, Pu Lalsawta Finance Minister na hnuaiah phei chuan kan sum dinhmun a that tawh em avangin bill pek theih loh a awm ngai lo a, GP fund leh healthcare bill thlengin harsatna a awm ngai lo. A huna sorkar hnathawk nghet hlawh pek theih loh a awm ngai hek lo. A taka hretu chu sorkar hnathawkte leh Mizoram mipui kan ni e.
Pu Ruatkima thusawi pakhat leh chu, “Congress sorkar hun 2013-2014 RE thleng khan leiba cheng vaibelchhe 5455.95 zet kan nei hman,” tih hi a ni a. Amaherawhchu, a sawi tel duh miah loh chu Congress sorkar lai khan State leiba kha a pung tlem hle tih leh MNF sorkar hnuah a pung chho nghal zawt zawt tih hi a ni. Congress sorkar kum tawp, 2018-19 financial year-a State leiba kha cheng vbch. 7315 a ni a, a hma kum aia a punna chu vbch. 35 chauh a ni. Congress sorkar lai khan a chang chuan leiba kha pung lovin a tlahniam zawk hial nia (2015-2016-ah a hma kum aiin vbch. 443-in leiba a tlahniam). MNF sorkar hnu kum 3 lek chhung hian kan state leiba chu a pung ta zawt zawt a, 2022-23 ah phei chuan Rs. Vbch. 12,553 zet a lo ni ta a, MNF sorkar hnu a leiba punna hi 2022-2023 thleng hian cheng vbch. 5238 zet a ni tawh a, 58.27% zetin a pung tawh tihna a ni. Pu Ruatkima’n Congress sorkar laia leiba zat a sawi vaibelchhe 5455 leh MNF sorkar hnu kum 3 lek chhunga leiba punna ringawt (5238 cr) hi a inzat thuak nia!
Congress sorkar liam ta kha duhthusam lohna tam tak awm bawk mah se, sum leh pai enkawlna kawngah kher chuan MNF sorkar nen hi chuan an inthlau lutuk deuh, tehkhin chi pawh a ni lo.
