Party Acting President Vanlalruata chuan, “Mizoram Finance Minister, Chief Minister ni bawk Pu Zoramthanga hi sum leh pai enkawl kawngah a hlawhchham lailet der a. Budget siam laia sum hmuh tura beisei aia tam kan sorkarin a hmu deuh ziah chungin sum hmanna lamah a hlawhchham avangin kan leiba a pung zual zel a. Tunah phei chuan leiba kan neih theih zat bituk aia tam kan ba tawh a ni,” tiin “Hemi siam that dan hi keini chuan kan thiam,” a ti.
Vanlalruata chuan vawiina an party meeting neihnaah thusawiin, GSDP atanga 27.85% chauh leiba neia kal tura policy siam a nih avangin Mizoram GSDP hi, leiba kan ngah theih nan, dik lo taka chhut pun a ni a. GSDP chhut pung chung pawhin tuna kan leiba hi kan GSDP atanga 34.51% a ni tawh a. Hei hian kan Finance Minister a hlawhchham a, Finance Minister thar kan mamawh tih a lantir chiang hle nia a ngaih thu a sawi a. Sorkarin sum hmuh a tlem thu an sawi thin laia budget-a sum hmuh tum aia tam an hmuh thin thu a sawi bawk.
Sum enkawl dan a fuh lohzia tar langin Pu Ruata chuan MNF sorkar hma kuma cheng vbc 1,699 lai revenue surplus awm thei kha an sorkar tan kumah cheng vbc 1,533-ah a tlahniam nghal a. Mahnia finance an enkawl tan kumah cheng vbc 204-ah tla thla nghalin a hnu kum atang chuan a deficit char char thu a sawi a. Hemi chungchangah hian Covid vanga sum hmuh tlahniam angin an sawi a, a takah chuan kum 2020-21-ah kan hmuh tum kan hmu pha lo tih lohah chuan kum tin kan hmuh tum aia tam kan hmu ziah a ni a ti a. Keini chuan hemi siam that dan tur hi kan hria a ni, a ti.
PC Party meeting hian Party President atanga chawl ta Pu Lalhmangaiha Sailo chu. EMERITUS PRESIDENT-ah a ruat a. Assembly neih dan tur chipchiar siam felin hma lak dan tur thui tak a rel bawk a ni.
