PC Party President Lalhmangaiha Sailo chuan, “The Federation of Mizoram Government Employees and Workers (FMGE&W) in DA pung an ngen hi an dikna chanvo anih avangin PC Party chuan a awm kan ti a, tihhlawhtlin sak turin Mizoram sorkar kan ngen a. Sorkar hnathawk pension kum atana kum 62 hman ngenna leh rawtna awm pawh hi PC Party chuan a ṭha kan ti a ni,” tiin vawiin a party office bearers’ meeting, an party office-a an neihah a sawi.
PC Party in sorkar kalphung siamṭhat a tum dan sawi zawmin Lalhmangaiha Sailo chuan, “Tunah hian kan sorkar hnuaiah thawktu indaihlohna a awm a. Chutihlaiin dinhmun pawimawh tak tak chelh, a nghet lova hun rei tak tak thawk tawh, mithiam leh hman tlak, hna thawktu ber ber ni chunga dinhmun derthawng taka awm tam tak an awm a. Sum harsatna leh revenue expenditure sang lutuk avangin thawktu indaihlohna phuhruk tur leh a nghet lova thawk te dah nghet turin sorkarin hma a la hlei thei lo tih mitinin kan hria a. Heng harsatna, thawktu indaihlohna leh a nghet lova thawkte tana a nghet a thawhna kawng hawng tur hian PC Party chuan sorkar department te kalphung siamthat (restructure) a ngai kan ti.
“Sorkar hnathawk leh mipui tana an dikna chanvo te pe a, sorkar kalphung leh hmalaknaa harsatna hrang hrang chingfel tura sorkar ṭha siam turin PC Party chuan ke kan pen a. Hmalak pui atan mipui kan sawm a ni,” a ti bawk.
