Tlawmngai pawl Foundation For Drug-Free Mizoram chuan an pawl Inkhawmpui Lian HIGH COUNCIL vawi 4-na chu Synod Conference Centre ah an ko va, mi 100 chuang an tel. Excise & Narcotics Minister Pu Lalnghinglova Hmar leh Excise & Narcotics Commissioner Pu Z. Lalhmangaiha ten Khuallian leh Khualzahawm niin an hmanpui.
HIGH COUNCIL ah hian Khuallian Pu Lalnghinglova Hmar Excise Minister chuan thusawiin, ruihhlo dona kawngah Mizoramin zawi zawiin hma a sawn zel tih sawiin; thah thlah lo turin he lama mawhphurtute a sawm a, Foundation For Drug-Free Mizoram hmalakna chu Mizoram Sorkarin a ngaihlu tih a sawi. Khualzahawm Pu Z. Lalhmangaiha, Excise Commissioner pawhin thu a sawi bawk.
HIGH COUNCIL ah hian an pawl member mi 5, ropuina a kaisang ta te hriatrengna hun an hmang a, Life Member leh Patron Member Certificate semin; ro an rel a, zanriah an kilho. HIGH COUNCIL hi an pawl adviser Rev. K. Lalpiangthara’n a kaihruai a, he pawl dintu leh an President Tv. V. Lalnunthara (Mathara) hnen atangin thuchah an ngaithla a, YMCA leh YMCA hruaitu ten chibai bukna an nei. High Council hian Resolution an siamah, Mizorama Ruihhlo dona a lungthu 3 – Supply Reduction, Demand Reduction leh Harm Reduction te chu thawhho ni rawh se tih an pass bawk.
