Mizorama tleirawlte ruihhlo laka venhna thawktu pawl Foundation For Drug-Free Mizoram chuan an pawl dinchampha kum 5-na pualin Aizawl khawpuiah Ruihhlo Tel Lo Nun Duhawm Zawk tih thupui a hmangin, Bawngkawn atanga Kulikawn thleng Rally an buatsaih a, an pawl member mi thahnem tak an thawkchhuak. Rally ah hian Kohhran hrang hranga rawngbawltute chu thusawi ah sawmin; Rev. Lallawmthanga Wesleyan Methodist Church, Rev. K. Lalpiangthara Presbyterian Kohhran, Rev. Dr. Ngurthanpara Sailo Mizoram UPC, Seventh Day Adventist atangin Rev. Sabbath Thanga leh The Salvation Army atangin Captain Isaak Lalremruatkima ten Rally ah hian thu an saw a. Ruihhlo chu kan hnam leh sakhaw hmelma, min siamtu Pathian pawisawina anih thu te, Ruihhlo Tel Lo Nun Duhawm Zawk thlang tura Tleirawlte nun fuihna neiin; Ruihhlo an tih loh avanga Malsawmna an dawn zawk tur thu te an sawi a, ruihhlo do kawngah chhungkua, kohhran leh khawtlang tan ho a tul zia uar takin an sawi.
Foundation For Drug-Free Mizoram hi V. Lalnunthara Mathara leh a hoten Dawrpui a V. Thanga Street a an din a ni a. An rawngbawlna kaltlang hian kum 5 chhungin school, college leh sunday school hmun 67 ah tleirawl mi 13,000 te chu ruihhlo laka fihlim turin signature card ah an lo intiam tawh a. Tunah hian Mizoram pumah member 1,050 an nei mek a, an zingah Pu Lalduhoma Chief Minister chu telin; he pawl Patron a ni.
