Aizawl, Oct , 03, 2022 : National Highway four lane, NH-306 & NH- 6 in a paltlang tur package 3 leh package 4 huamchhunga Roadside Reserve Forest Area (RRF) ah mimal ram awm nia sawite leh Forest Plantation awm nia hriatte a hmun ah endik na neih a ni.
Thudawn danin RRF huamchungah hian compensation award la tur mimal ram engemaw zat a awm a, award la tura hming lang thenkhat chu a taka ram pawh nei chuanglo, anmahni ram awmna leh thlai awm pawh hre lo te an nia sawi a awm bawk a. Heng mi thenkhatte avang hian ram neitu dik takte pawhin compensation lak tur chungchangah harsatna an tawk a, tun thlengin ala fel thei loa, chutih mek laiin kawnglaih hnathawk tur NHIDCL lamin Forest atanga phalna anti fel theilo bawk a, tin Forest Department lamin an Reserved huamchhunga mimal ram leh an mahni puala Plantation an neih te anla tih chian theih loh bakah hemi atana chhinchhiah fel ngaite anla peihfel loh avangin kawnglaihzauh hna thawh tan theih a nilo a, compensation sum pawh pek chhuah theih a ni lo bawk.
Hetianga Fourlane kawnglaihzauh na tura chinfel ngaite tihfel maitheih a nih loh avangin kar kalta nilaini khan Kolasib DC kaihruaiin DC conference hall ah 4th Lane kawnglaih zauhna tura Ministry in thuneihna a pek Kolasib Addl DC leh CALA ni bawk, DFO, Revenue SO, NHIDCL leh Package 3 atanga 6 inkara ram neitu intelkhawm aiawh te telin thil awmdan sawifiahna neih a ni a. He thutkhawm in alo rel angin Package 3 leh 4 huam chhunga Forest ram leh Plantation te a hmuna endik (Joint Verification) neih nise an ti a, chuta an enfiahna atanga an report chu pawm mai turin an rel thlu a ni. Hetah hian forest department lamin notification beh chhanin 30-800 mtrs forest area chu an hauh tih an sawi a, RRF an puan chhungah hian forest plantation a awm tak tak em tih enfiah a ni a. Rengtetlangsang thing dinna hmun te chu RRF a ni lo tih an sawi thei lo niin official lam te chuan an sawi a. Chutih laiin Bilkhawthlir South area-ah chuan ramhnuaiah fourlane hi a kal dawn a, forest lam pawhin plantation an neih loh thu an sawi nia thudawn a ni bawk.
Hetih lai hian a hmuna kal ve ram neitute chuan an harsatna chu chinfel vat an duhthu an sawi a, “Forest ram chhung ni lo tih hriat sa te hi chu department hian min sign sak mai se pawisa pawh kan la thei tawh tur a nia. An sign duhlo a nih chuan ram neitute kan in hmukhawm ve dawn a, kan hmalam hun tur hi kan sawi thei lo. Keimahni lamah pawh pressure a sang tawh lutuk, kan inkhap thin a, thu zaizap zawngin hma kan la zel a, mahse kan in dang zel a nih chuan engnge thleng zel ang kan sawi thei lo,” an ti.
DC office atang hian lehkha pakhat siamsa, four lane kalna tur allignment duansa ah Forest department-in plantation/thing an neilo a ni tih certificate (lehkha) ken nghal a ni a, hetah hian DFO aiawh, NHIDCL aiawh, surveyor, a concern VCP, Sub Hqrs YMA aiawh, a concern branch YMA aiawh leh ram neitute hming sign-na tur siamlawk a ni. Forest department aiawha kalte chuan thutawp siam thei an nih loh thu leh office-ah report an pek hmasak phawt dawn thu an sawi a, an hotute thutlukna anga kal mai tur an nih thu an sawi. Hei bakah plantation awm ngeina hmunte a awm vangin hotute thu hmu hmasa lo chuan hming an ziak ngawt ngam lo tih an sawi bawk.
