BJP Mizoram Pradesh chuan nimin khan Friday Political Session neiin, Johny Lalthanpuia, State Media Convener-in inkhawm a kaihruai a, Vanlalhmuaka, State President-in thusawina hun a nei a ni.
Vanlalhmuaka chuan, “India Ram hi Secular Ram kan ni a, Sakhua lam huam lo leh thliar bik neilo a ni a, nimahsela Sakhaw tam tak erawh chuan chu chu hrethiam lovin, Secular India nilo ang mai in kan in zirtir ṭhin hi a pawi hle a, BJP chu Secularism vawng hima hmala tu kan ni,” a ti.
Vanlalhmuaka chuan, “Mizoram ah MNF Sorkar hian Flagship Programme atana SEDP an hman ah pawh hian Secularism bawh chhiatna lian tak tak a awm a ni. Heng lovah pawh hian mahni Party tihbik tlatna, party dang en kan na leh thliarna hi nasa takin an kalpui a. Political Party reng reng hian Affiliation an tih dawn in thlei bik leh thliar bik a rem loh thu an intiam thlap a ni. Chuvangin Democracy leh Secularism ram kan ni a, chi leh chi emaw, sakhua chungchangah emaw thliar bik tumah an neih a thianglo a ni. Chumi anih avang chuan Central ah BJP kaihhruai Sorkar hian India ram puma India mi tute tan pawh PM Scheme kaltlangin tumah thliar leh thlei bik neilovin, a mamawh leh a dawng tur dik tak te’n an dawn a, an chan theih nan hma kan la mai zawk a ni,” a ti.
Pu Vanlalhmuaka chuan, “Kum 2023 ah BJP in Sorkarna kan chan theihna turin tun hunah hian District Headquarters hrang hrang te’n nasa takin hma an la mek a, an hmalakna aṭangin Party dang VC (Village Council) tam tak te chuan BJP VC thar an siam nual tawh a ni a ti.
Vanlalhmuaka chuan Kum 2023 ah chuan ‘Give Change a Chance’ tih hi vawiin hian kan auhla tur pakhat a ni dawn a, thlakthleng danglamna lo thlenna turin mipui hian BJP tan hun i pe ang u a ti a, BJP chuan kan ram leh mipuite ah, thlakthleng danglamna a lo thlenna tura dal tu lian ber Corruption hi kan hnungkhirh dawn a, Corruption avanga kan ram chhiatna hrang hrang hi a rapthlakin hei hi kan tih bo loh chuan, Mizoram hian hma kan sawn thei dawn lova, Corruption tihbo a nih theih nan BJP hi Sorkarna kan pek a ngai a, chumi hnu ah chuan ‘Sabka Saath Sabka Vikas’ Mi tupawh in an chanvo chan tur ang an chang ngei ngei tur a ni tih hi a takin Mizoram mipui, mirethei leh hausa te hnenah rualkhaiin kan chang tawh dawn a ni,” a ti bawk.
