Green Mizoram Network (GMN) Founder President P.C.Lalthakima chu vawiin (dt.2.6.2025) Thawhtanni dar 11:15am hian Aizawl Civil Hospital-ah a boralsan a. Green Mizoram Network(GMN) hi ama hovin June ni 4, 2009 khan din a ni a, June ni 21, 2010 khan Mizoram sorkar-ah ziahluh (registered) niin, kum 16 chhung zet Green Mizoram Network-ah hian office bearers-ah nihna hrang hrang a chelh a. A thihni thleng hian Sr. Vice President hna a chelh a ni.
P.C.Lalthakima hi ramngaw, nungcha, kan environment humhalh kawnga mi thahnemngai tak niin, a theihna zawng zawng a hlan a. Zai leh hlaphuah lama Zofate hriathlawh tak anih avangin, kan ram leh environment humhalhna lam hla a phuah pawh mi te hriat hlawh tak tak a ni hlawm.
Green Mizoram Network (GMN) chuan, “P.C.Lalthakima hi kan ui a, kan sun a, kan ram tana mi thahnemngai a herliam ta mai hi pawi kan ti. A hnathawhte chhunzawm zel turin kan inhlan thar a, ‘Pu P.C.Lalthakima dam reng rawhse’ kan ti a ni,” tiin thuchhuah an siam.
