Governor Hari Babu Kambhampati chuan vawiin chawhma khan Raj Bhavan-ah NABARD Official te a kawm a. He hunah hian Pu KVSSLV Prasada Rao, GM, NABARD, Mizoram leh a thawhpuite chuan Mizoram chhunga an hmalakna, sawrkar, Bank leh mimal nena an thawhhona bakah thil pawimawh nia an hriatte Governor hnenah hian an thlen a ni.
Governor Hari Babu Kambhampati chuan NABARD in Mizoram hmasawnna tura hmalakna pawimawh tak tak te thawhna turin sum a puktir thin chu lawmawm a tih thu a sawi a. Sawrkar leh mimal anga thawhpui tam tak NABARD in a nei tih a hriat thu te sawiin Mizoram hmasawnna atan thawktu tangkai tak ni chhunzawm turin NABARD hnathawtute chu a sawm a ni. Governor chuan Agriculture and allied sector huanga hmalakna te chu nasa zawk tanlak pui an ngai nia a hriat thu a sawi a. A bikin Ar vulh tute leh Sangha vulh tute tanpui kawngah NABARD chu nasa zawka luangchhuak turin a sawm a ni.
Pu Prasada Rao chuan NABARD in Mizoram chhunga hma an lo lak thin dan te leh thil pawimawh nia a hriat te Governor hnenah hian a thlen a. NABARD chuan Mizoram sawrkar hmalakna te Rural Infrastructure Development Fund (RIDF) kaltlangin tanpuina sum pe/puktir thin tih a sawi a. RIDF hnuaiah hian thingtlang hmun hrang hrangah a mamawhtute tan Kudam, bungraw/thil dahkhawlna in, kuthnathawktute eizawnna huanga thil tangkai siamna leh pawimawh dang siam a ni thin a ti. Heng bakah hian mimal leh Bank te pawh an hmalakna atan sum an puk tir thin tih a sawi bawk a ni.
NABARD hotuten report an pek dan chuan kum 2021-211 chhungin Mizoram Rural Banks leh Mizoram Coop. Apex Bank te hnenah refinancing angin Rs.115 crore puk tir an ni a. Hemi hun chhungah tho hian State Sawrkar hnenah RIDF hnuaiah Rs.311 crore puktir an ni tawh a; sawrkar a puktir tawh zat chu Rs.1907 crore a ni mek a. Tunah hian he sum hmang hian project 495 thawhmek niin Rs 440 crore la sanction loh a awm mek a. He sum la pek chhuahloh sanction nan hian project thenkhatte chak zawka kalpui a ngai tih tarlan a ni.
Pu T Guite, DGM leh Pu Diginjay Rawal, Asst. Manager, NABARD te pawh Governor leh GM, NABARD inkawmnaah hian an tel a ni.
