Governor Hari Babu Kambhampati chuan vawiin khan Raj Bhavan-ah State Bank of India (SBI) leh Regional Rural Banks (RRB) hotute a kawm a. Meeting hmasa zawkah Pu V Siva Kumar, General Manager(RRB), SBI Corporate Center, Mumbai leh Pu Jaya Chandra, Chairman, Mizoram Rural Bank te chuan Mizoram Rural Bank hmalakna hrang hrang leh an hmasawnna te an sawi a. Meeting hnuhnung zawkah hian Pu Rakesh Kumar Ravi, Regional Manager, SBI chuan SBI in hma a lak mek dan leh Mizoram chhunga an hmachhawp te a sawi bawk a ni.
Governor Hari Babu Kambhampati chuan tunhnaiah Bank lam ten an thawhrim avangin hma an sawn hle tih a sawi a. Tan lak chhunzawm zel erawh a ngai a ti. Central Sawrkar hnuaia scheme tha tak tak atanga tanpuina te customer leh beneficiary ten an hmuh theihna turin heng scheme ah te inziaklut thar an pung sawt tih SLBC report atangin a lo hmu tih a sawi a. Lawmawm a tih thu sawiin sumdawng te nau zawk – dawrte neia khawlaia thu, chawhmeh zuar leh a dang ten loan an lak theih na tura tanlak erawh a ngai a ni a ti. Governor chuan Bank hnathawkte chu an hunawlah khawlai fang kuala hawker te, dawrte nghak te leh chawhmeh zuar te tlawh kual a, bank atanga an sumdawnna pui tura pawisa an puk theih chungchang te hrilhfiah turin a chah a. Sumdawnna tenau zawk hmanga eizawng te hian hma an sawn zel a, an sumdawnna te an tihlen theih nan Mudra Shishu loan(Rs 50,000 thleng) leh Mudra Kishor Loan (Rs 50,000/- atanga Rs 10 Lakh thleng) an puk theih thu te an hriatchian a ngai a ni a ti.
Governor chuan Bank hnathawk te chu PMJDY, PMJJBY, PMSBY, etc., scheme ah beneficiary tam zawk ziak lut tura tan la chhunzawm turin a chah bawk a ni.
Shri V Siva Kumar, General Manager (RRB), SBI Corporate Center, Mumbai leh Shri Jaya Chandra, Chairman, Mizoram Rural Bank chuan Governor hnenah hian Mizoram Rural Bank in internet banking facility nimin atangin a nei thar tih an sawi a. MRB hotute sawi dan chuan MRB chu India hmarchhak bialah Internet banking facility nei hmasa ber an ni a. Tunah chuan Mizoram chhunga MRB bank branch leh Customer service point 500 ah internet banking a tih theih dawn a ni. MRB Branch hawn belh tum a ni tih an sawi a, hei hian tuna bank awm tlemna hmun thenkhat, abikin Chawngte leh Siaha bial chhunga bank dawr chungchanga mipuite harsatna pawh enge maw chen a tih ziaawm an rin thu an sawi bawk.
- Shri Rakesh Kumar Ravi, Regional Manager, SBI pawhin SBI hmalakna, hmasawnna thenkhat leh scheme hrang hranga beneficiary enrollment tihpun kawnga tanlak chhoh an tum dan te a sawi a. Mamit district chu aspirational district a nih avanga Bank lama mamawh hrang hranga thuam chak a nih tur thu tarlangin Mizoram hmun hrang hranga bank branch hawn belh tum a nih thu a sawi bawk a ni.
