Vawiin chawhma khan Raj Bhavan-ah Governor Hari Babu Kambhampati leh Pu Ravideep Singh Sahi, IGP, Tripura Sector, CRPF te an inkawm a. He hunah hian Mizoram chhunga CRPF hnathawh leh mipui vantlang tana an luanchhuah chungchangte an sawi dun a ni.
Governor Hari Babu Kambhampati chuan CRPF ten an hnathawh pangai tha taka an thawh bakah an awmna hmuna cheng mipui vantlang tan rotling thil tangkai tak te an siam thin chu lawmawm a tih thu a sawi a. Nimin lamah Zemabawk veng chhungah mipui vantlang tan tangkai tur inbualna, inthiarna leh waiting shed te Civic Action programme kaltlanga CRPF ten an sak te chu hawn a ni tih a lo hriat thu leh lawmawm a tih thu a sawi a ni. Governor chuan CRPF te chu an awmna hmuna cheng mipui vantlang te nen inlaichinna tha tak nei chhunzawm zel turin a chah bawk.
Pu Ravideep Singh Sahi, IGP, Tripura Sector, CRPF chuan tun tuma Civic Action Programme 2022 kaltlanga an hnathawh chungchangte Governor hnenah hian a sawi a. Heng bakah CRPF in Mizorama an hnathawh tlangpui leh thil pawimawh dang te pawh Governor hnenah hian a thlen bawk a ni.
Pu Ravideep Singh Sahi chuan Mizoram mipuite chu an hawihawm a, thawhhona tha tak an neihpui thei a. Mipui vantlang hruaitute nen pawh inpawh tlang takin hna an thawk ho thi . Hetianga thawhhona thak tak neih chhunzawm zel an duh thu te sawiin CRPF pawhin an theihna zawnah Mizoram tan theihtawp chhuah zel an tum a ni a ti. Pu Ravideep Singh Sahi hi a thawpui CRPF officer ten an rawn tawiawm a ni.
