Governor hoin IIT Tirupati leh Director of NIT Mizoram te inkawm

Governor Hari Babu Kambhampati chuan Prof K.N. Satyanarayana, Director, Indian Institute of Technology(IIT) Tirupati leh Prof S.Sundar, Director, NIT Mizoram te chu Raj Bhavan-ah a kawm a. He hunah hian leimin vanga harsatna thleng thin pumpelh chungchang te, science thiamna hmanga Mizorama kut hnathawktute hmalakna tanpuina chungchang te leh NIT Mizoram sak hna thawh dan tur chungchangte an sawiho a ni.
Vawiina Governor Hari Babu Kambhampati hoa mithiamte a kawmna ah hian Mizoram leilung pianhmang leh sik leh sa tlangpui te bakah Mizorama thlai leh thei tha duh bik chungchangte a sawi a. Thlai leh thei thenkhat tan Mizoram leilung a tha bik nia sawiin Dragon Fruit, Lakhuih thei, leh thildang te chu hmundang aiin Mizoramah a thar tha bik a, Mizorama tharchhuahte chu a tui bik a, tunah hian dragon fruit chin leh thar kawngah phei chuan Mizoram chu India rama hmahruaitu a ni a. Hei hi state dangte pawhin an rawn entawn mek a ni a ti. Governor chuan heng sum chang thei thlai leh thei te hi tunlai science thiamna nena kuthnathawktute tanpui an nih chuan tun aia hlawk zawkin a thar theih tih a sawi a. He,mi kawngah hian awmze nei zawka hmalak a nih theih nan NIT Mizoram pawhin ngaihtuahna seng tan se, campus an neih hunah phei chuan Innovation Hub din thei se a tangkai hlein a rin thu a sawi a ni.
Tun ah hian NIT Mizoram sakna tur atan environmental clearance chu hun rei tak buaipui a nih hnuah Mizoram sawrkar leh NIT Mizoram thawhrimna azarah a hmawr bawk tep a ni tawh a, NIT Mizoram hmunhma zau zawng chu 150 Acre vel a ni tih a sawi a. A sak dan tur – blueprint pawh a tha hle nia a hriat thu sawiin sak zawh a nih chuan chuan NIT awm mek zinga tha ber pawl a ni dawn a ni a ti.