Vawiin ni 27.01.2025(Thawhtanni) chawhma dar 11:00 khan Mizoram Governor Gen.( Dr) Vijay Kumar Singh-a’n Central YMA hruaitute lengah a sawm angin Central YMA hruaitute nen an inkawm a. Central YMA President Pu Lalhmachhuana leh Office Bearer dang 5 te an tel.
Inkawmnaah hian Larsap chuan Mizo khawtlang nunah YMA pawimawhna leh a hnathawh te a lo hriat tawh thu leh Mizoram leh Mizo khawtlang nun siamthat kawnga theihtawp chhuah zel turin Central YMA hruaitute chu a sawm a.
Central YMA hruaitute hian NGO Darpan Portal chungchanga harsatna an neih te siamrem a nih theihna tura hma lak sak turin an ngen a. India Constitution 8th Scheduled a Mizo tawng dah ve a nih theihna tura hma lak pui tur leh hemi chungchanga Prime Minister hnena lehkha an siam chu thehluh sak turin an ngen nghal bawk.
An inkawmnaah hian Mizoram leh state dang inkalpawhna kawngpui tha hlei thei lo chungchang te sawiho a ni bawk a, Larsap hian Mizorama a awm chhunga inkalpawhna kawngpui in hma a sawn theihnana tan lak a tum thu leh a hmunah tlawh a tum thu a sawi. Ruihhlo in Mizo khawtlang nun a run nasat dan leh thalai tam tak ruihhlo bawia an tan dan te, ruihhlo do kawnga YMA hmalak dan leh Sawrkar nen thawhho dan te sawi lan a ni bawk.
Larsap chuan Central YMA a chet chuan Mizo society ah thil tam tak a tih theih thu leh mipui tanhona a pawimawh thu a sawi bawk.
Central YMA hruaitute hian YMA kalphung leh inrelbawl dan te sawi langin Larsap hi Central YMA hmingin Khumbeu leh Ipte chei an hlan nghal bawk. Larsap hian hun remchangah Central YMA Office tlawh a tum thu a sawi bawk.
