Vawiin khan Prof. Lalnilawma, Minister, Rural Development & Administration chuan Govt. Aizawl West College (GAWC) Freshers’ Social 2025 chu Vanapa Hall-ah khuallian niin a hmanpui a, 32nd Annual Magazine ‘Thlado’ a tlangzarh bawk.
Minister Prof. Lalnilawma chuan zirlaite mawhphurhna lian ber chu lehkha tihtakzeta zir a nih thu sawiin nakina hlawhtlinna changa ram leh mipui tana mi tangkai an la nih ngei theih nan lehkha tha taka zir turin zirlai kalkhawmte chu a chah a. Kan ramah National Education Policy (NEP) kalpui a nih thu leh he policy hian mahni subject bik thiam mai bakah zirlaite mihring hman tlaka chherchhoh a ngaih pawimawh thu a tarlang bawk a.
Minister chuan hlawhtlinna chan mai bakah hlawhchhamna hmachhawn thiam a pawimawh thu sawiin zirlaite chu harsatna an hmachhawn chang pawha beidawng mai lo turin leh chung harsatnate chu chhelna leh tumruhna an neih nana ‘stepping stone’ anga hmang zawk turin a chah a. Hlawhltinna hi beidawnna atanga pen khatah a awm tih sawiin hlawhtlinna kawng zawh chhuak tur hian harstana leh beidawnna paltlang thei tura inbuatsaih tel a tul thu a sawi a ni.
GAWC Principal Prof. C. Lalthlengliana chuan kalkhawmte lawmna thu leh zirlaite fuihna thu a sawi a. Vawiin program hi GAWC Students’ Union buatsaih niin, Pu Chawngthantluanga, General Secretary hnen atangin report ngaihthtlak a ni a. Pu Lalchhuantlinga, Asst. Common Rooms Secretary chuan lawmthu sawiin hun a khar a ni.
Vawiina zirlai titha Mizoram University Undergraduate B.A. Examination 2025-a Rank Holders chawimawina dawngte chu a hnuaia tarlante hi an ni –
1. Lalrozama Khawlhring, 2nd rank, Dept. of Economics – H. Vanlalkeuva Award
2. Ramengmawii, 5th rank, Dept. of Economics
3. Precillis C. Remsangpuii, 4th rank, Dept. of Education
4. Lallawmawma, 8th rank, Dept. of Public Administration
5. Jennet Vanlalthlani, 8th rank, Dept. of Political Science
6. Lalringngheti Sonset, 1oth rank, Dept. of Psychology
