Aizawl April 27 : Vawiin chhun khan Govt. T. Romana College hnuaia Thingsiri Cultural Club te chuan tunhnaia lawmman an lak lawmna, an College hmunah an nei a, Thingsiri Cultural Club a Adviser a ruat thar Pu C. Lalrambuatsaiha, MJA president chuan.khuallian niin a hmanpui.
Khuallian Pu Buata chuan Mizoram ah pawl kan din zung zung a, a ṭhen chu mahni hamṭhatna atan te a ni a. He Club erawh chu ram leh hnam tan a ding, hnamdang zingah Mizo te min pholangtu ṭangkai tak inni e, a ti. ‘Mizo te hian hnamdang angin infrastructure leh industry ropui nei ve lo mah ila, talent kan nei ṭha a, kan hnam zai leh lam hmangin khawvelin min hmelhriat ve thei a. Ṭawng chu bo thei a nih laiin culture erawh a bo ve thei lo,’ tiin, he club in Patron atana MJA President an lo hman tawh ṭhin angin MJA chuan theihtawp a chhuah zel tur thu a sawi. Govt. T. Romana College Principal Dr. Jenifer Lalbiakdiki chuan an college hnuaia mi Thingsiri Cultural Club ten trophy 3 ngawt tunhnaia an lak theih chhan chu zirlaite leh hemi lama theihtawp chhuahpui ṭhintu MZP leh MSU te thlawpna an dawn ṭhat vang a ni a ti a. An college chu a dintirh aṭanga college zirlai luhna tur hre lote luhna a ni a, Pathian malsawmna a ni, a ti bawk. Thingsiri Cultural Club hi kum 2010 a din niin 2021-2022 chhungin- MSU Cup-Cheraw kan tluangah 1-na: MZP Inter College Cultural Competition-Cheraw (Buhzai) ah 2-na leh Tribal Dance Hunt-Aizawl District ah lawmman 2-na an la a.ni. An lawmman an lak lawmnaah hian MJA bakah MZP, MSU leh hruaitu hlui ten an hmanpui a, zai leh lamin hun hlimawm tak an hmangho a ni.
