PC Party Senior Vice President Pu Vanlalruata chuan, Grape leh Wine chungchanga sawrkar chet dan hrang hrangin sawrkar awmze neih lohzia a pho lang, a ti.
Vawiina party Office-a amah kawmtute hnenah Pu Ruata chuan, “FOCUS (Fostering Climate Resillent Upland Farming System) hmangin tun hnaiah khawchhak tlangdungah mi eng emaw zat Grape chingtute ṭanpuina pek an ni a, mi dang pawh pek leh tum mek a ni,” tiin Mizoram sawrkarin Grape ching tawh sate a tihbuai char char laiin, mi eng emaw zat a chin thartir leh thu a sawi a. “Mizorama kan Grape chin hi table variety (a puma ei mai chi) a ni lo va. Hei hi sawrkar pawhin a hre chiang em em a. A hman theihna awm chhun chu wine siamna atana hman hi a ni a, hei pawh hi sawrkarin a hre chiang tiin, Wine siamna atana hman tur sawrkarin a chin belhtir a wine tam zawk siam chhuah tuma hma lakna ni bera a ngaih thu a sawi a.
Hetianga wine siamna tur chin belh tir leh lawi si hi tun hnaia Grape an man leh Mizoram Liquor (Prohibition) Act, 2019 nen a inkawkalh tlat thu a sawi a, “Dan hmanga wine siam leh zawrh khap a nih lai leh a zuartute pawh man an nih laia wine siamna tur grape an chin thartir leh lawi si hian sawrkar awmze nei lo a nihzia a tar lang a ni a ti bawk.
“Keini chuan, awmze neia thlai chin leh thar chhuah sawngbawla a chingtute leh a sawngbawltuten harsatna an tawh miah lohna tur policy ‘Khawl Hnuh Hmasawnna—Mi tin tan In leh Hna’ neiin kan tlangzarh tawh a. A hlawhtlin nan kan bei zel dawn a, hma lakpui turin mi zawng zawng kan sawm a ni,” a ti bawk.
