Vawiina Congress Thalaiin thuchhuah an siamah chuan, “Nimin Dt 25.10.2022 (Thawhlehni) khan Mizoram Chief Minister Pu Zoramthanga chuan Champhai Grape Winery tlawhin Grape wine hralhna chungchangah, ‘Project mumal tak siamin hma kan la ang,’ tih a la sawi chauh chu Congress Thalai Hqrs. chuan vanduaithlak a ti hle a. Kum 2007-a MIP pawisa hmanga bul lo tanpui tawhtu-in vawiina hmalakna mumal an la nei miah lo leh hmalakna thar tur a la sawi leih leih chauh mai chu Grape chingtute hmakhua tih tak takna nena an beihpui lohzia tilangtu a nih bakah, hmui chauha kut hnathawktute hmangaih thin tih buichhia laih lovin a in puang niin Congress Thalai chuan a hria a ni,” an ti.
Thuchhuahah chuan, “Kumin 2022 May ni 27 khan Champhai Winery te siam chhuah Grape Wine zuartu Pi Lalhriatpuii (L) chu a dawr Millenium Centre atangin a Grape wine zawrh lai thahnem tak chu Excise & Narcotics Deptt chuan Excise Minister thupek angin an mansak a. Mizoram sawrkar chu Grape wine chungchangah kalphung mumal nei chuang lova Grape chingtute lehlamah fuih chung siin, lehlamah an siam chhuah (product) mansak leh si an nih avangin an dinna tichiang turin Congress Thalai chuan a lo ngen tawh a. Pi Lalhriatpuii (L) bungrua an mansak pawh pe let vek tura Excise Minister a lo ngen tawhna pawh Congress Thalai dinna a la ni reng a, a bo a bang awm lova bungrua pe let tur leh zangnadawmna pe turin Congress Thalai chuan Mizoram sawrkar a ngen nawn leh a ni,” an ti bawk.
