“Mizoram sorkar leh Grape chingtute inkara ‘inhriatthiam tawnna’ hmanga Grape Wine zawrhchhuah a nih mek laiin, tun hnaiah Excise and Narcotics Department chuan thuneitu sang atanga thu an hmuh denchhenin May ni 27, 2022 khan Aizawlah Grape Wine thahnem tawk tak an man a. Hei vang hian Grape Wine zuartute leh Champhai leh Hnahlan lama Grape chingtuten harsatna nasa tak an tawh phah ta mek a, hemi chungchangah hian Mizoram sorkar hian thu leh hla mumal tak nei vat a, kuthnathawktute leh an thawhrah zuartute chungthu hi rel fel vat turin kan ngen a ni,” MPYCC chuana ti.
Congress Thalaite chuan, “Excise and Narcotics Department changtu Minister Dr. K. Beichhua chuan tun hnaia Grape Wine an man sakte chu zu an ‘check’ na lama ‘man palh’ ni-a a sawi laiin ; Dt. 6/6/2022-a Excise and Narcotics Department lam thuchhuak chuan MLP Act 2019 danah thil tuiril ‘alcohol’ pai tel reng reng chu man theih a nih thu thuchhuah an siam leh thung a. Mizoram sorkar hian MLT Act 2019 leh MLP Rules a pawm danah Grape Wine chungchanga a thutlukna hi chiang taka puangzar vat turin kan phut a.
“Excise Minister Dr. K. Beichhua hian kumin June ni 2 khan Kolasib-a Press mite a hmachhawnnaah Millennium Centre-a Grape Wine an manna neitute chuan ; zu, beer leh Korean wine an kawl tel niin a sawi lang tel a. Hemi chungchangah hian Vanglaini daily chanchinbu-in Millennium Centre lama dawr neitute a biaknaah dawr neitute hian Minister puhna hi thudik lo a nih thu an sawi tawh a, hetianga State pakhat Minister meuhin mipui hriata thudik lo a lo sawi a nih chuan, thudik lo hmanga a hliam Millennium Centre-a dawr neitute hnenah leh Mizoram mipui hnenah hian ngaihdam a dil kan phut a ni,” a ti bawk.
