Vawiin khan MPCC Treasurer Dr.Lalmalsawma Nghaka chuan Aizawl Press Club-ah chanchinthar lakhawmtute a kawm a. Amah tawiawmtu Prof. Lallianchhunga, MPCC Spokespersion chuan, “India rama nitin chanchinbu rintlak ber zinga ngaih, The Indian Express in August 1,2023 a a tarlan danin, Mizoram chu State sum thawhchhuah (Gross State Domestic Product) atanga chhutin India ram State leh Union Terrritory zingah leiba ngah ber a ni a. Hei hian Mizoram Chief Minister leh Finance Minister ni bawk, Pu Zoramthanga hi Mizoram sum leh pai enkawl thiam a ni lo tih a tarlan rualin, Mizoramin a mamawh chu thusawi thiam ringawt ni lo, sum leh pai enkawl thiam hruaitu a mamawh zia a tarlang chiang hle a ni,” a ti.
MPCC Thupuangtu chuan, “Mizoramin state a nih, kum 1987 atanga kum 30 chhunga leiba a neih chhoh zel tlingkhawm leh MNF sorkarin kum 5 chhung leka leiba a neih belh zat hi a intluk thuak tawh a ni. Hetiang khawpa leiba pung chak hian Mizoram sorkar hi a la awm ngai lo a, sum leh pai enkawlna kawngah MNF sorkar ang em em a hlawhchham leh talbuai hi Mizoramah an la awm ngai hek lo. Leiba rulh nana leiba dang a insiam belh zel avangin Mizoram hi MNF sorkar hnuaiah leiba thang (debt trap) ah a tang mek a. Sorkar lo awm leh tur tan pawha rulh huphurhawm tak, chet ti harsa tham leiba an hnutchhiat ngei dawn a ni,” a ti bawk.
“Kumin Budget a Mizoram leiba tur zat a chhut chu cheng vaibelchhe 13557.32 a ni a. Kum 2023 a Mizorama mihring awm tur zat (Projected Population – 13,70, 000) atanga chhut chuan naupiang hlim pawhin Rs.98,958 leiba nei ang kan ni. MNF sorkar hian Budget a leiba zat tura chhutlawk (Budget Estimate) aia tam leiba kum tin a nei ziah a, chuvangin nausen piang hlim atanga puitling leiba zat hi a tak takah chuan hei aia tam a ni ang.
MNF Sorkar hnuaiah hian MNF MLA fel tak tak awm mah se, a lu ber Chief Minister enkawlna hnuaiah thil tha lo an hriat pawh an dodal ngam chuang lo a; an mit hmuh lai ngeiin Mizoram chu Leiba Thangah a tang ta mek a ni. Tawngkam thiamna ringawtin ram min hruai tha lo tih hi Mizoram mipuiin a takin kan hre mek a. Leiba thanga tang mek Mizoramin a mamawh ber chu ram hruaitu – sum leh pai enkawl thiam, enchhin pawh ngai lo, mi rintlak leh mi dik a ni,” MPCC Thupuangtu chuan a ti bawk.
