Hachhek bialtu Lalrindika Ralte, MLA chuan a bial chhung Hachhek South Block fangin khaw hrang hrang – Darlak, Mualṭhuam, Thaidawr, W. Bunghmun leh Tumpanglui-ah te MNF leh BJP aṭangin mi thar duhawm tak tak 43 a lawm lut.
Hachhek bialtu MLA Lalrindika Ralte chuan, “Kum 4 chuang bialtu MLA ka nihna angin kan lo inhrawn tawh a. Ka mizia te, MLA fund hmanga ka hnathawhte hi a hre chiangtu in ni. Mi famkim ka ni lo chung leh min hriat chian tawh hnua Congress Party-a lawmluh tur kan han nei thei zel hi lawmawm ka ti takzet a. Opposition MLA kan ni a, chhuan tlak leh chapo pui tham hna thawh a harsa. Chuti chung chunga ka chunga rinna nghata min la ring tawk tih ka hriat hian Hachhek Bial mipuite chungah ka lawm tak zet a ni,” a ti.
Lalrindika Ralte chuan, “Party-ah kan inhmanna la rei lo mahse, kan hriat phak tawkah Congress Party chuan a thutiam a tihlawhtling lo ngai lo. Kan ti ang an tih chu an ti mai zel. Pathian leh mipuite zara Congress Party kan sorkar a nih chuan, mi harsa zawk, dinhmun hnuaihnung zawkte chhanchhuahna turin Ṭang Puihna cheng nuai 2, a tul chuan a aia tam pawh kan pe dawn. Ṭang Puihna hi NLUP anga chhungkaw tin hnena sem dur dur tur a ni lo. Nasa taka hnathawk, ṭhahnemngai si, ding chhuak thei lo an awm. Chung mite dinhmun ṭha zawka an awm theihna tura Ṭang Puihna hi ruahman a ni,” a ti.
Pu Lalrindika Ralte, MLA chuan kan ram dinhmun chhiat zia sawiin, “Sorkar hnathawkte pawhin a hun takah hlawh an la thei lo va, tual thihna a tam em em a, dan pawisak lohna a lianin eirute an zalen em em a. Hetiang zela kan ram hi a kal a nih chuan chhanchhuah thlak loh khawpin kan ram hi a awm thei a ni. Chumi chhanchhuak tur chuan keini ṭawngkam thiam lo, mi tam takin a Politician lo an tihte Pu Lalsawta hovin kan rawn pen chhuak a. Kan ram siamṭha tur hian theihna kan nei a, chu chu duham loh hi a ni. Sorkar pawisa hi mipui pawisa, mipui ta a ni a, kan sorkar hrawn mekin party campaign-na atana sorkar sum an hmang hi thil dik a ni lova. ‘In khaw kawng kan siam sak ang che u ang a, kan party ah rawn lut rawh u,’ titute hian mipui hmangaihna an nei lo tih lo hre reng rawh u. Congress Sorkar laiin hetianga sorkar sum hmang a, mipui vau behna leh campaign-na a awm ve ngai lo,” a ti bawk.
Lalrindika Ralte, MLA bial fang hi dam takin vawiinah Aizawl a lo lut leh a ni.
