ZPM chuan vawiin khan thuchhuah siamin, “Hachhek bial chhunga khaw hrang hrang ten an kuhva thar hralhna kawnga harsatna an tawk hi ZPM chuan pawi a ti hle. Kuthnathawktute hian an thlai thar hralhna kawnga harsatna an tawh avangin kawng hrang hrangin hma an la a, CM hial hmuin an harsatnate ngaihtuahpui turin an lo ngen tawh a ni. Hetiang a ni chunga vawiin thlenga harsatna an la tawk leh lungawi loh lantirna hial neih ngai khawpa a awm ta mai hi ZPM chuan pawi a ti hle a; ramchhung mipuite thawhrim rah hralhna ngaihtuahsak chu sawi loh, a phurh chhuahna kawnga an harsatna tawh takngial pawh chingfel thei lo sawrkar neih hi a manganthlak tak zet a, kan sawrkar hrawn mek hian kuthnathawktute a ngaihsak loh zia lantirnaah ZPM chuan a ngai a ni.
“Hetiang a nih lai hian nimin thleng khan ramdang kuhva ro tawlhruk ni ngeia hriat hmuh a la ni a, sawrkar check gate engemawzat paltlanga Hachhek bial a la thleng thei hi dan kengkawhtuten an haider lui ngei niin a lang a, ZPM chuan mak a ti takzet a ni.
“Hachhek Bial Kuhva Chingtu Pawl, Hachhek all VC leh all NGO te huaihawtin vawiin atanga Hachhek bial mipuiten lungawilohna an lantir a ngai ta hi ZPM chuan pawi a ti hle mai a. Kuthathawktuten harsatna namenlo tak an tawh mek lai hian kan sawrkar pawhin maimitchhinsan lovin, dan hnuaiah rorelna fel tak kengkawh a, an harsatnate a rang thei ang bera sutkiansak thuai turin ZPM chuan a phut tlat a ni.
“ZPM chuan kuthnathawktute hmasawnna hi ngaihpawimawh ber (top priority) a ni a. Pathian leh mipui zara sawrkarna kan siam ve hlauh te a nih chuan, hnam zahawm kan nih theihna turin ei leh bara kan intodelh ngei theih nan hma kan la dawn a ni. A ram mipuite thawhrah thlai thar hralhna sawrkarin a ngaihsak duh loh avanga vawiin thlenga harsatna kan tawk hi ZPM chuan pawi a ti takzet a ni,” an ti.
