Kum hlui thlah leh kum thar lawm zan a halpuah, halmawi leh meithallawn kawl, zawrh, hralh leh hal chungchangah Aizawl khawpui chhungah mi 28 man an ni a, thubuai 26 ziahluh a ni.
Aizawl district SP C. Lalruaia sswi danin, Kum hlui thlah leh kum thar lawmna atana halpuah leh a kaihhnawih kawl leh zuarte lakah hian Aizawl Police Station-ah thubuai 4 ziaklutin mi 2 man an ni a, Kulikawnah mi 1 an man lakah thubuai 1 ziahluh a ni a, Bawngkawn Police Station-ah thubuai 6 ziaklutin mi 8 man an ni a, Vaivakawn Police Station-ah mi 5 manin thubuai 4 ziahluh a ni. Halpuah leh a kaihhnawih hal avangin Aizawl Police Station-ah thubuai 4 ziaklutin mi 4 man an ni a. Bawngkawn Police Station-ah thubuai 6 ziaklutin mi 6 man an ni a. Vaivakawn Police Station-ah mi 2 an man a, thubuai 1 ziahluh a ni a. Kulikawn Police station-ah thubuai ziah luh leh mihring man an awm lo a ni.
Mizoram sorkar duhdan angin district hrang hrang bawrhsapte chuan Krismas leh Kum Thar hun laiin halpual leh a kaihhnawih dangte zawrh, hralh leh hal a khap a. Khap a ni chung hian Aizawl khawpui-ah chuan Kum hlui thlah zanah nasa takin hal a ni a. District khawpui dangah chuan a nasa lutuk lova, Khawzawl-ah phei chuan hal an awm meuh lo ni a thudawn a ni.
Hetihlai hian Mizoram Pollution Control Board (MPCB) chuan December ni 31 zan a boruak leh bengchheng dinhmun hi an la puangzar thei lova. MPCB Secretary C. Lalduhawma chuan bengchheng leh boruak dinhmun hi an khawl chuan a chhinchhiah vek a, mah se, chu chu endik a zirchian leh phawt a ngaih dawn thu a sawi a. Pisa kai leh hunah an puangzar thei dawn niin a sawi a ni.
