Vawiin ni 22 November, 2024 hian Ailawng Gov’t. Middle School chuan an kum 50 na an lawm a, he hun hi Pu Lalrintluanga Sailo bialtu MLA chuan Khuallian niin a hmanpui a ni.
Khuallian chuan, “Dampa bialtu MLA ni tura min thlantlin tirha, he bial tâna ka rualawhna leh ka ngaihpawimawh ber chu Zirna chungchang hi a ni, atir aṭanga theihtawp chhuahin term hmasa ah khan Higher School panga kan din hmana, Tin, Middle School leh High School engemaw zat kan upgrade bawk anih kha, duhtawk chin awmlo mahse he biala zirna hmasawnna nasa tak avang hian ka lawm em em a, he school pawh hian hmasawnna tur tam tak ala nei ngei ang, hma asawn zel theih na tur hian kan phâk tawkah kan ṭang tlang zel ang tih ka sawi duh.” tiin school tual zawl PCC Flooring na tur a pek bakah Govt. Middle School Souvenir atlangzarh nghal bawk a ni.
He hunah hian school din a nih a Headmaster hmasa ber Pu K. Zoliana pawhin thusawiin, ‘Harsa tak chunga school kan lo din ve ṭawk ṭawkin kum 50-na hmel a lo hmu ta mai hi ka lawm hle maia, vawiin ka school ka lo tih ve ṭhin naupangte hnena ka chah duh cheu chu, Rinawmna, Tumruhna leh Taimakna vawng tlata zir ṭhin ten hlawhtlinna an hmu ṭhin a, kan nunkawng tinrengah Pathian hi a hmasa ber a ni, tih i hre reng ang u’ tiin fuihna thu a sawi.
Ailawng Middle School hi kum 1974 ah din niin, tunah hian zirlai naupang 44 awm mekin, staff 11 an awm a zirlai tam tak lo zir chhuak tawhin, mi hlawhtling tak tak a lo chher chhuak tawh a ni. A tirah mipui sum thawhkhawm hmanga harsa taka din, Ailawng M/s School hi 1994 ah sawrkarin la felin Govt.Middle School, Ailawng tih a lo ni ta a ni.
