Vawiin khan MPCC chuan thuchhuah siamin, “SEDP hnuaia Board siamchawp, Health & Family Welfare Board-a Vice Chairman, Dr. ZR Thiamsanga, MLA chuan April 8, 2022 (Zirtawpni) khan Hnam Runah thu sawiin, ‘Mizoram State Healthcare hi MNF bul tan a ni a, Party dangin sawi tur an nei lo. La sorkar ve lo party phei chuan sawi tur an nei lo,’ a ti a. Dr. ZR Thiamsanga hi hmeichhe enkawl thiam bik Doctor lar tak a ni a, hetiang thu buluk deuh sawi tura kan lo ngaih loh zinga mi a nih avangin Congress Party chuan mak kan ti hle a ni.
“Zep rual lohin Mizoram Healthcare Scheme bul tantu chu MNF sorkar a ni a, an sorkar tawp kum, 2008 April 1 a bul tan a ni. Amaherawhchu, kalphung felfai zawka siamthatu leh a taka kalpuitu chu Congress sorkar a ni tih hretu chu Mizoram mipui an ni. Congress-in Healthcare system a siamthat hnuah leiba a awm ngai tawh lo a, hun reilote chhungin bill pek nghal zel a ni. Health care system fel tak awm sa, tun a tichhe leh vek tu leh leiba vaibelchhe tam tak siamtu chu MNF sorkar bawk a ni. Healthcare chungchangah chauh lo pawh Mizoram Politics-ah hian MNF hi ti chhetu an ni a, Congress hi MNF tihchhiat siamthatu kan ni zel a ni.
“Dr. Thiamsanga hian, ‘MSHCS bultan nan a tirah Sum bawmpui (Corpus Fund) siam a ni a, cheng vbch. 50 dah nghal a ni,’ a ti bawk a. Hei hi RTI zawhna chhanna atangin thu dik lo a ni tih chiang takin a lang. Finance Department-in April 5, 2022-a RTI zawhna an chhan danin ‘MSHCS Corpus Fund hi ADB Project Mizoram Public Resource Management hnuaia Health Sector Improvement peng pakhat a ni a, hetah hian Health Corpus Fund atan Rs. 117.80 crore dah a ni,’ a ti a, Corpus Fund dah kum pawh Congress sorkar hnu, kum 2010-ah a ni. Dr. Thiamsanga sawi cheng vbch. 50 hi chu Corpus Fund ni lovin, MNF Vice President atanga an paihthlak tak Pu R. Tlanghmingthanga fate hminga an thawhna Bajaj Allianz-a an dah pun zawk kha a ni. Dr. Thiamsanga’n he thil a sawisual kher nachhan hi hriatthiam a har hle.
“Dr. Thiamsanga chuan thu mak tak sawiin, ‘Kum pangngai nise Healthcare bill ba kan nei lo ang. COVID vangin harsatna kan tawk,’ a ti bawk a. Hei pawh hi thu dik lo hmanga mipui hruai sual tumna chiang tak a ni. COVID-19 avanga kan buai chhung zawng pawh khan Corpus Fund pung, cheng Vbch. 4 hi Finance Department-in quarter tin a pechhuak zat zat reng a, hei hi COVID-19 hri len hma pawha a pek zat tho a ni. Chuvangin, Healthcare Fund buaina hi COVID-19 nen a inkaihhnawih lo a, COVID-19 vangin Healthcare sum hmuh a tlahniam miah lo bawk.
“MNF MLA zingah hian mi thiam tak tak an awm a, chung zingah pawh chuan Dr. Thiamsanga hi mipuiin kan beisei san berte zinga mi a ni. Amaherawhchu, House chhung leh pawna a thusawi duh danah mipui beisei pha lo ber niin a lang thung. Mi thiam a nihna hi Politics-ah a hmang tangkai miah lo niin kan hria. MSHCS hi MNF duanchhuah a nih avanga midangin sawi tur kan nei dawn lo a nih chuan, COVID-19 hrileng kara an hman tangkai em em Medical College leh Lengpui Airport-te hi eng sorkar siam nge tih lo ngaihtuah nawn leh se kan duh hle a. Tin, Healthcare hi mipui tana siam a nih angin a tha lo lai chu Mizoram mipui hian sawi zel rawh se tih hi Congress Party ngaihdan a ni,” tiin an tarlang a ni.
