Vawiin khan MNF Party chuan thuchhuah siamin, “Tunhnai maiah Congress Party-in Chief Minister zahawm tak Pu Zoramthanga chu Health Care Scheme chungchangah dawt sawi angin an puhna a. Pu Zoramthanga’n: ‘Mizoram State Health Care Scheme (MSHCS) atan Congress Party-in kum 10 sorkarna an chan chhungin cheng khat mah an dah lo. Kan awm loh chhungin cheng khat mah dah belh a awm lo,’ tia a sawi chu Mizoram Pradesh Congress Committee (MPCC) chuan, “Dawt” tiin an puh a. Hei hi dawt a ni lova, hetiang hi thil awm dan chu a ni,” tiin a hnuai a mi ang hian a sawifiahna an tarlang.
Health Care Scheme kan sawi hian chi hnih a awm –
1) Central Sorkar Scheme: AB-PMJAY – Ayushman Bharat Pradhan Mantri Jan Arogya Yojana (Golden Card). AB-PMJAY hi RSBY – Rashtriya Swasthya Bima Yojana (Smart Card) thlaktu a ni.
2) Mizoram Sorkar Scheme: MSHCS – Mizoram State Health Care Scheme a ni.
I. MNF BULTAN MSHCS: Mizoram State Health Care Scheme hi State dangten state sponsor-a healthcare an kalpui ve hma daih, April 2008 khan MNF Sorkar bultan a ni a. A tirah State Plan Fund hnuaiah Rs. vbc 50 dah a ni. Thil thar a nih angin Central H&FW Consultant-te rawtna angin Insurance Company nen thawhdun a ni a, Reliance General Insurance Company Ltd chu open tender kaltlanga thawhpui an ni. He MSHCS hnuaiah hian natna zawng zawng Rs. nuai 1 thleng bill theih a nih bakah, natna khirh bik (cancer, lung zai, hepatitis c, etc.) tan Rs. nuai 2 dang bill belh theih a ni.
MSHCS kalpuina atan Sum Bawmpui (Corpus Fund) siam a ni a, Sorkar sum ei hek lova intodelh thei tura duangin MNF Sorkar (2003-08) chuan kum 2007 tawp lam khan Asian Development Bank (ADB) hnuaia structural adjustment loan a dil a. Kum 2009-ah agreement ziak a ni a, kum 2010 khan Rs. vbc 117 hmuh a ni a. Hetih hunah hian Congress Sorkar a lo piang tawh a ni. He pawisa Rs. vbc 117 hi loan condition (thu delh kilh) angin MSHCS Corpus Fund-a chhun ngei ngei tur a ni a, thil danga hman theih a ni lo.
II. CORPUS FUND & A PUNG NEN AN ROCHUNG: Congress Sorkar thar khan Reliance Company-in bill pek chhuah loh an neih tam vang leh Plan Fund atangin Rs. vbc 10 chu Bajaj Allianz (fortune plus)-ah invest a nih vang chhuanlamin April 2009 – August 2010 thleng MSHCS a kalpui ta lo a. A hnu daih, September 2011 atangin company hnuaia pawisa invest lovin Mizoram Health Care Scheme tiin bank hrang hrangah investment a ti ta a. A tira plan pawisa Rs. vbc 50 atanga Bajaj Allianz-a Rs. vbc 10 mature, a pung Rs. vbc 1.3 vel a ni a, Sum Bawmpuia a pung (interest) pawh kum hnih chhung hman a ni lo. Tichuan a pung nen Sum Bawmpuia tlingkhawm chu Rs. vbc 155.56 lai a tling chho ta a ni.
III. CHENG KHAT MAH AN DAH BELH LO: A chunga tarlan ang khian ABD loan leh pung bakah, State fund – Corpus fund tur pungte chu MSHCS-ah dah loh theih a ni lova. Congress kum 10 sorkar khan anmahni kut kawih leh State sum atangin Mizoram healthcare scheme-ah cheng khat mah an dah belh loh bakah health care hnuaia bill theihte chu natna khirh bik (critical illness) chauh a ni. Congress Sorkar hunlaia Corpus Fund an tihte khi MNF Sorkar hmalakna vek a ni zawk.
IV. MNF SORKARIN A TITHAR: December 2018-a MNF Sorkar a lo pian khan Mizoram Health Care Scheme chu ngai pawimawhin October 2019 atangin policy tharah natna zawng zawng bill theih turin siam a ni leh ta a. Tin hemi atan hian SEDP atangin Rs. vbc 20 sanction nghal a ni a. Health Care Scheme intodelh nan kum tin Sum Bawmpuia Rs. vbc 50 dah belh zel tura ruahman a nih angin kum 2020-21 khan Sum Bawmpuiah Rs. vbc 50 crore dah leh nghal a ni.
V. BILL CHINFEL A NI DAWN: Healthcare-in harsatna a tawh chhan chu Corpus Fund hi Finance Deptt-in a enkawl a, Bank hrang hrangah dah pungin, quarter tinin bill atan Rs vbc 4 an pechhuak thin. Thla tina bill lut hi Rs vbc. 6-7 vel a ni. Congress hunah khan natna khirh bik chauh bill thei a, healthcare hnuaia inziak lut pawh mi 30,000–40,000 vel an nih lain MNF Sorkar-ah chuan mi 90,000-10,00,000 vel an inziaklut a, tluang taka bill pek thin a nih laiin November 2020 atang khan harsatna a lo awm ta a ni. Tunah hian MNF Sorkar chuan theihtawp a chhuah a. Corpus Fund-a dah turin ADB Loan Rs. vbc 1004 (Central 80 : State 20) dil mek a ni a. Hei hi Ministry of Finance hnuaia Screening Committee-in a pawm tawh a, tunah chuan ADB dawr hmabak mek a ni.
